જમ્મુ-કાશ્મીરનાં કુપવાડામાં સુરક્ષા દળોએ બુધવારે હિઝબુલ મુજાહિદ્દીન સાથે સંકળાયેલા પૂર્વ આતંકવાદી મંજૂર અહેમદ ભટની ધરપકડ કરી. તેની પાસેથી ચીનમાં બનેલી પિસ્તોલ, 2 મેગેઝીન અને 16 ગોળીઓ મળી આવી હતી.

પોલીસના જણાવ્યા અનુસાર, મંજૂર અગાઉ પણ 2 કેસમાં ધરપકડ થઈ ચૂકી છે. તે સંગઠન માટે આતંકવાદી ગતિવિધિઓમાં મદદ કરવા ઉપરાંત હથિયારો પૂરા પાડવાનું કામ કરતો હતો. પોલીસને હંદવાડા-કુપવાડા વિસ્તારમાં હિઝબુલ સાથે સંકળાયેલા એક મોડ્યુલ સક્રિય હોવાની માહિતી મળી હતી. આ જ આધારે સુરક્ષા દળોએ કાર્યવાહી કરીને તેને પકડ્યો.

જમ્મુ-કાશ્મીરનાં શોપિયાં જિલ્લામાં સુરક્ષા દળોએ 24 ઓગસ્ટની રાત્રે ચેકિંગ દરમિયાન 6 શંકાસ્પદ આતંકવાદીઓની ધરપકડ કરી હતી. તેમની પાસેથી 2 હેન્ડ ગ્રેનેડ અને હિઝબુલ મુજાહિદ્દીનનાં 5 પોસ્ટર મળ્યા હતા.

તે જ સમયે, પુલવામામાં પણ સુરક્ષા દળોએ યરવાન જંગલમાં સર્ચ ઓપરેશન દરમિયાન બે શંકાસ્પદ આતંકવાદી સહયોગીઓની ધરપકડ કરી હતી. તેમની પાસેથી એક પિસ્તોલ, 12 કારતૂસ અને હેન્ડ ગ્રેનેડ મળી આવ્યા હતા.

આ પહેલાં સોપોરના મંજસીર વિસ્તારમાં સુરક્ષા દળોએ સંયુક્ત સર્ચ ઓપરેશનમાં હથિયારો જપ્ત કર્યા હતા. અધિકારીઓના જણાવ્યા અનુસાર, એક ખાલી પડેલા ઘરમાંથી AK-47 રાઈફલ, 3 મેગેઝીન, 72 કારતૂસ, 4 હેન્ડ ગ્રેનેડ અને એક IED મળી આવ્યું હતું.

જમ્મુ-કાશ્મીર પોલીસે લશ્કર-એ-તૈયબા ટેરર મોડ્યુલ સાથે સંકળાયેલા કુલ 5 લોકોની ધરપકડ કરી હતી. તેમાંથી બે પાકિસ્તાની આતંકવાદીઓ હતા અને બાકીના તેમના મદદગાર હતા. એક આતંકવાદીની ઓળખ અબ્દુલ્લા ઉર્ફે અબુ હુરેરા તરીકે થઈ હતી. અબ્દુલ્લા 16 વર્ષથી ફરાર હતો. જ્યારે, બીજો પાકિસ્તાની આતંકવાદી ઉસ્માન ઉર્ફે ખુબૈબ હતો.