માઇક્રોસોફ્ટ તેના કુલ કર્મચારીઓમાં લગભગ 2.1% નો ઘટાડો કરી રહી છે, જે અંતર્ગત લગભગ 4,800 કર્મચારીઓની છટણી કરવામાં આવશે.

ટેક ઇન્ડસ્ટ્રીમાં ચાલી રહેલી છટણી વચ્ચે, વિન્ડોઝ બનાવતી આ દિગ્ગજ કંપનીએ AI ઇન્ફ્રાસ્ટ્રક્ચર પરના ભારે ખર્ચ અને બિઝનેસમાં કાર્યક્ષમતા વધારવા માટે આ નિર્ણય લીધો છે.

મોટી ટેક કંપનીઓનો AI પરનો ખર્ચ આ વર્ષે 700 બિલિયન ડોલરથી વધુ થવાની અપેક્ષા છે. તેના કારણે કંપનીઓ પર રોકાણનું વળતર દર્શાવવા અને ટેકનોલોજી લાગુ કરવામાં આવી રહેલા ભારે ખર્ચને ઘટાડવાનું દબાણ વધી રહ્યું છે. આ જ દબાણને કારણે આ વર્ષે એમેઝોન અને મેટા પ્લેટફોર્મ્સે પણ તેમના હજારો કર્મચારીઓને નોકરીમાંથી કાઢી મૂક્યા છે.

માઇક્રોસોફ્ટે સોમવારે મુશ્કેલ છ મહિના પછી છટણીની આ જાહેરાત કરી છે. 2026 ના પ્રથમ છ મહિનામાં કંપનીના શેરમાં લગભગ 20% નો ઘટાડો થયો છે, જે 2022 પછી કંપનીનું સૌથી ખરાબ છ મહિનાનું પ્રદર્શન છે.

આ પહેલા આ વર્ષે સોફ્ટવેર જાયન્ટ માઇક્રોસોફ્ટે તેના અમેરિકન વર્કફોર્સના લગભગ 7% એટલે કે લગભગ 9,000 કર્મચારીઓને સ્વૈચ્છિક બાયઆઉટની ઓફર કરી હતી.

માઇક્રોસોફ્ટ ઘણીવાર જૂનમાં તેના નાણાકીય વર્ષના અંતની આસપાસ નોકરીઓમાં કાપ મૂકે છે, કારણ કે આ સમયે કંપની નવા નાણાકીય વર્ષ માટે તેની ખર્ચ યોજનાઓને અંતિમ સ્વરૂપ આપે છે.

AI ની મજબૂત માગને કારણે માઇક્રોસોફ્ટના એઝ્યુર ક્લાઉડ કમ્પ્યુટિંગ બિઝનેસમાં સારી વૃદ્ધિ જોવા મળી છે, જે એપ્રિલ સુધી ઓપનએઆઈના મોડલ્સનો એક્સક્લુઝિવ સેલર હતો.

જોકે, આ સેવાઓને ટેકો આપવા માટે ડેટા સેન્ટર્સ બનાવવાનો સતત વધતો ખર્ચ કંપનીના કેશ ફ્લો પર ભારે દબાણ લાવી દીધું છે.

કંપની આ મહિનાના અંતમાં તેના ત્રિમાસિક પરિણામો જાહેર કરી શકે છે. આ પહેલા એપ્રિલમાં કંપનીએ વોલ સ્ટ્રીટના અંદાજો કરતાં વધુ ત્રિમાસિક એઝ્યુર રેવન્યુનો અંદાજ મૂક્યો હતો.

આ સાથે જ કંપનીએ વર્ષ 2026 માટે 190 બિલિયન ડોલરના કેપિટલ એક્સપેન્ડિચરનો અંદાજ લગાવ્યો છે, જે વિશ્લેષકોની અપેક્ષાઓ કરતાં ઘણો વધારે છે.

રૂટિન બિઝનેસ ટાસ્કને ઓટોમેટ કરતા AI ટૂલ્સ પણ માઇક્રોસોફ્ટના સોફ્ટવેર બિઝનેસ માટે એક પડકાર બનીને ઉભર્યા છે. આ સાથે જ, ડેટા સેન્ટરની માગને કારણે મેમરી ચિપની કિંમતોમાં ભારે ઉછાળો આવ્યો છે.

આ કારણે કંપનીને તેના એક્સબોક્સ (Xbox) ગેમિંગ કન્સોલની કિંમતો વધારવાની ફરજ પડી છે, જ્યારે બજારમાં તેની માંગ પહેલેથી જ નબળી ચાલી રહી હતી.

ગેમિંગ ડિવિઝનના નવા વડા આશા શર્માએ ગયા મહિને કહ્યું હતું કે આ વ્યવસાયને ‘રીસેટ’ની જરૂર છે. ગેમિંગ ડિવિઝનનો નફાનો માર્જિન ઘટીને 3 ટકા પર આવી ગયો છે, જેના કારણે રીસ્ટ્રક્ચરિંગ જરૂરી બન્યું છે. આ પુનર્ગઠનમાં સંભવિત મર્જર અને એક્વિઝિશન (M&A) પણ સામેલ હોઈ શકે છે.

કર્મચારીઓને મોકલેલા અને કંપનીની વેબસાઇટ પર પ્રકાશિત એક મેમોમાં આશા શર્માએ કહ્યું કે એક્ટિવિઝન બ્લિઝાર્ડ કિંગ સિવાય, છેલ્લા પાંચ વર્ષમાં અમે અમારા કન્ટેન્ટ, પ્લેટફોર્મ અને હાર્ડવેર સબસિડી પર ચાલી રહેલા રોકાણમાં 20 બિલિયન ડોલરથી વધુ ખર્ચ કર્યા છે.

જોકે, આ સમયગાળા દરમિયાન અમારી વાર્ષિક આવક લગભગ અડધા બિલિયન ડોલર ઘટી ગઈ છે. આગળ જતાં તેને આમ જ ચાલુ રાખી શકાય નહીં. એક મીડિયા રિપોર્ટ અનુસાર, કંપની એક્સબોક્સ ગેમિંગ યુનિટને એક અલગ કંપની બનાવવી કે તેને સંપૂર્ણ માલિકીની પેટાકંપની તરીકે પુનર્ગઠિત કરવાના વિકલ્પો પર વિચાર કરી રહી છે.