મારુતિ સુઝુકીએ સોમવારે ભારતમાં પહેલી ફ્લેક્સ-ફ્યુઅલ કાર વેગન-આર બાયોફ્લેક્સ લોન્ચ કરી છે. નવી વેગન-આર સંપૂર્ણપણે E85 ફ્યુઅલ (85% ઇથેનોલ મિશ્રિત પેટ્રોલ) થી ચાલશે. વેગન-આર બાયોફ્લેક્સને બે વેરિઅન્ટમાં રજૂ કરવામાં આવી છે. તેની શરૂઆતની કિંમત 7.24 લાખ રૂપિયા રાખવામાં આવી છે. કાર હાલમાં ટેક્સી અને ફ્લીટ જેવા કોમર્શિયલ સેક્ટરના લોકો ખરીદી શકશે.

તેની ડિઝાઇનમાં કોઈ ફેરફાર કરવામાં આવ્યો નથી, પરંતુ E85 ફ્યુઅલ પર ચલાવવા માટે એન્જિન અને અન્ય પાર્ટ્સમાં ટેકનિકલ ફેરફારો કરવામાં આવ્યા છે. આ જ કારણોસર તે સ્ટાન્ડર્ડ મોડેલ કરતાં 86 હજાર રૂપિયા મોંઘી છે.

જ્યારે, કોમર્શિયલ સેગમેન્ટમાં મળતી વેગનઆર ટૂર H3 ની સરખામણીમાં તેનું ફ્લેક્સ-ફ્યુઅલ વર્ઝન 1.35 લાખથી 2.25 લાખ રૂપિયા સુધી મોંઘું છે. વેગનઆર ટૂર H3 ની કિંમત 4.99 લાખથી 5.89 લાખ રૂપિયાની વચ્ચે છે.

ફ્લેક્સ ફ્યુઅલ વેગન-આરમાં પર્ફોર્મન્સ માટે એક નવું 1.2-લિટર ફ્લેક્સ-ફ્યુઅલ પેટ્રોલ એન્જિન આપવામાં આવ્યું છે, જે E85 ઇથેનોલ બ્લેન્ડેડ ફ્યુઅલ સાથે સુસંગત છે. E85 ફ્લેક્સ ફ્યુઅલ માટે એન્જિનમાં ઘણા યાંત્રિક ફેરફારો કરવામાં આવ્યા છે. કંપનીએ તેમાં અપગ્રેડેડ ફ્યુઅલ ઇન્જેક્ટર્સ, નવો ફ્યુઅલ પંપ, નવી ફ્યુઅલ લાઇન્સ, રી-કેલિબ્રેટેડ ECU અને એક સ્પેશિયલ ઇથેનોલ સેન્સર લગાવ્યું છે.

આ બદલાવના કારણે સ્પેશિફિકેશન્સમાં થોડો તફાવત આવ્યો છે, જે રેગ્યુલર 1.2-લિટર પેટ્રોલ એન્જિન થોડી વધુ પાવર અને ટોર્ક આપે છે. જોકે, કંપનીએ હાલમાં નંબર શેર કર્યા નથી. આ એન્જિન સાથે હાલમાં 5-સ્પીડ મેન્યુઅલ ગિયરબોક્સ આપવામાં આવશે.

માઇલેજની વાત કરીએ તો કંપનીએ હજુ સુધી ઓફિશિયલ આંકડા જાહેર કર્યા નથી. જોકે, તાજેતરમાં થયેલા ફ્યુઅલ ટેસ્ટ મુજબ, E85 ફ્યુઅલ પર ચાલવાથી માઇલેજમાં લગભગ 24% સુધીનો ઘટાડો જોવા મળી શકે છે. સ્ટાન્ડર્ડ પેટ્રોલ વેગન-આર મેન્યુઅલમાં 23.56kmpl નું માઇલેજ આપે છે.

નવી વેગન-આર ફ્લેક્સ ફ્યુઅલની ડિઝાઇન સ્ટાન્ડર્ડ મોડેલ જેવી જ છે, પરંતુ તેને અલગ ઓળખ આપવા માટે કેટલાક કોસ્મેટિક ફેરફારો કરવામાં આવ્યા છે. રેગ્યુલર મોડેલથી આ ખાસ વેરિઅન્ટને અલગ કરવા માટે કંપનીએ તેની બોડી પર ‘Flex Fuel’ ના ગ્રાફિક્સ આપ્યા છે. ટેલગેટ પર એક નાનો ‘Flex Fuel’ નો ક્રોમ બેજ પણ લગાવવામાં આવ્યો છે.

એક્સટીરિયરની જેમ નવી વેગન-આર ફ્લેક્સ ફ્યુઅલનું અંદરનું લેઆઉટ પણ તેના સ્ટાન્ડર્ડ મોડેલ જેવું જ રાખવામાં આવ્યું છે. જોકે, કેબિનને વધુ પ્રેક્ટિકલ અને આરામદાયક બનાવવા માટે તેમાં ઘણી ખાસ સુવિધાઓ આપવામાં આવી છે.

• ડેશબોર્ડ અને થીમ: કારમાં થોડું ઊંચું ડેશબોર્ડ છે, જે ડ્રાઇવરને સારી ફ્રન્ટ વિઝિબિલિટી આપે છે. કેબિનને પ્રીમિયમ લુક આપવા માટે તેમાં બ્લેક અને બેજ કલરની ડ્યુઅલ ટોન થીમ આપવામાં આવી છે. ડેશબોર્ડની વચ્ચે ટચસ્ક્રીન ઇન્ફોટેનમેન્ટ સિસ્ટમ છે. તેની બંને બાજુ વર્ટિકલ (ઊભા આકારના) AC વેન્ટ્સ છે.
• કંટ્રોલ્સ અને ચાર્જિંગ: ઇન્ફોટેનમેન્ટ સિસ્ટમની નીચે મેન્યુઅલ AC કંટ્રોલ્સ આપવામાં આવ્યા છે. મોબાઇલ અને અન્ય ગેજેટ્સને ચાર્જ કરવા માટે નીચે ચાર્જિંગ પોર્ટ અને 12-વોલ્ટનો પાવર સોકેટ પણ મળે છે.
• સ્ટિયરિંગ વ્હીલ અને કન્સોલ: 3-સ્પોક સ્ટિયરિંગ વ્હીલ પર ઑડિયો અને મીડિયા કંટ્રોલ બટન (માઉન્ટેડ કંટ્રોલ્સ) મળે છે. તેની સામે એનાલોગ ઇન્સ્ટ્રુમેન્ટ ક્લસ્ટર છે, જે MID (મલ્ટી ઇન્ફોર્મેશન ડિસ્પ્લે) સ્ક્રીન સાથે આવે છે, જ્યાં ગાડી સંબંધિત જરૂરી જાણકારીઓ દેખાય છે.
• સીટિંગ અને સ્પેસ: કેબિનમાં ફિક્સ્ડ હેડરેસ્ટ સાથે પાતળી ફ્રન્ટ સીટો છે. ટૉલ-બૉય ડિઝાઇનને કારણે તેની પાછળની (રીઅર) સીટ આ સેગમેન્ટની અન્ય કાર કરતાં વધુ જગ્યા ધરાવે છે. ઊંચા કદના મુસાફરો માટે પણ તેમાં હેડરૂમ અને નીરૂમની કમી નથી, જેનાથી લાંબી મુસાફરી આરામદાયક રહે છે.