આવનારા દિવસોમાં રોજિંદા વપરાશની આવશ્યક વસ્તુઓ મોંઘી થઈ શકે છે. સિસ્ટમેટિક્સ રિસર્ચના રિપોર્ટ અનુસાર, કાચા માલની વધતી કિંમતોને કારણે કંપનીઓ સતત મોંઘવારીના દબાણ હેઠળ છે, જેના કારણે તેઓ પોતાની પ્રોડક્ટ્સના ભાવ વધારી શકે છે.

રિપોર્ટમાં જણાવાયું છે કે અલગ-અલગ કેટેગરીની કંપનીઓએ છેલ્લા એકથી બે મહિનામાં જ પોતાની પ્રોડક્ટ્સની કિંમતોમાં સરેરાશ 3% થી 7% સુધીનો વધારો કર્યો છે. તેનું મુખ્ય કારણ એ છે કે કંપનીઓની રો મટિરિયલ બાસ્કેટની કિંમતમાં સરેરાશ લગભગ 10% નો વધારો થયો છે.

એપ્રિલની રિટેલ મોંઘવારી વધીને 3.48% પર પહોંચી ગઈ છે. આ પહેલા માર્ચમાં તે 3.40% હતી. મોંઘવારી વધવાનું સૌથી મોટું કારણ ખાવા-પીવાની વસ્તુઓના ભાવમાં વધારો થવો છે. ફૂડ ઇન્ફ્લેશન એપ્રિલમાં વધીને 4.20% પર પહોંચી ગયું. માર્ચમાં આ આંકડો 3.87% હતો.

ઇનપુટ કોસ્ટમાં થયેલા આ વધારાની ભરપાઈ કરવા માટે કંપનીઓ કિંમતો વધારવાની સાથે-સાથે ‘ગ્રામ કટ’ એટલે કે પેકેટનું વજન ઘટાડવાનો રસ્તો પણ અપનાવી શકે છે.

રિપોર્ટ અનુસાર, કેટલીક ખાસ કેટેગરીમાં ખર્ચ ખૂબ ઝડપથી વધ્યો છે:

• પેકેજિંગ મટિરિયલ (HDPE): શેમ્પૂની બોટલ, ડિટર્જન્ટ કન્ટેનર અને ફ્લેક્સિબલ પેકેજિંગમાં વપરાતા પ્લાસ્ટિક (HDPE)ની કિંમતો 56% સુધી વધી ગઈ છે.
• ક્રૂડ અને પામ ઓઇલ: પશ્ચિમ એશિયામાં ચાલી રહેલા તણાવ વચ્ચે બ્રેન્ટ ક્રૂડ ઓઇલની કિંમતો 32% સુધી ઉછળી ગઈ છે. જ્યારે પામ ઓઇલના ભાવમાં પણ 11%નો વધારો થયો છે.

કાચા માલની આ મોંઘવારીની અસર માર્ચ ક્વાર્ટર (Q4FY26)માં જ દેખાવા લાગી હતી, જ્યારે મોટી કંપનીઓનું ગ્રોસ માર્જિન ઘટ્યું હતું. વાર્ષિક ધોરણે તે 0.50% ઘટ્યું છે.

આ વર્તમાન મોંઘવારીની સૌથી મોટી અસર નાણાકીય વર્ષ 2027ના પ્રથમ છ માસિક ગાળા (H1FY27)માં જોવા મળશે. વર્તમાન ખર્ચ વૃદ્ધિની ભરપાઈ કરવા માટે કંપનીઓ તેમના ઉત્પાદનોના ભાવ વધારી રહી છે, જેથી તેઓ નુકસાનથી બચી શકે. પરંતુ મોંઘવારી એટલી વધારે છે કે વર્ષ 2026-27માં કંપનીઓનો કુલ નફાનો ટકાવારી (માર્જિન) ઓછો રહેવાની આશંકા છે.