પશ્ચિમ બંગાળના મુખ્યમંત્રી મમતા બેનર્જીની આગેવાની હેઠળની તૃણમૂલ કોંગ્રેસ (TMC)માં આંતરિક કટોકટી સતત ઘેરી બની રહી છે. ટીએમસીના વરિષ્ઠ સાંસદ કાકોલી ઘોષ દસ્તીદારે એક સનસનાટીભર્યો દાવો કર્યો છે કે, પક્ષના આશરે 20 લોકસભા સાંસદોએ સ્પીકર ઓમ બિરલાને સત્તાવાર પત્ર લખીને કેન્દ્રની એનડીએ (NDA) સરકારને સમર્થન આપવાની જાહેરાત કરી છે. જો કે, આ કથિત પત્ર અને તેમાં સામેલ સાંસદોના નામ હજુ સુધી જાહેર કરવામાં આવ્યા નથી. આ દાવાએ મમતા બેનર્જીની રાજકીય પકડ અને તૃણમૂલ કોંગ્રેસના ભવિષ્ય સામે મોટા સવાલો ઊભા કર્યા છે.

તૃણમૂલ કોંગ્રેસમાં ચાલી રહેલો આંતરિક વિખવાદ હવે સંપૂર્ણપણે સપાટી પર આવી ગયો છે. પક્ષના રાજ્યસભા સાંસદ સુષ્મિતા દેવ અને તે પહેલાં વરિષ્ઠ નેતા સુખેન્દુ શેખર રાય પક્ષમાંથી રાજીનામું આપી ચૂક્યા છે. આ આંચકાઓ વચ્ચે કાકોલી ઘોષ દસ્તીદારના દાવાએ બંગાળના રાજકારણમાં મોટો ભૂકંપ લાવી દીધો છે. કાકોલી ઘોષે સ્પષ્ટ કર્યું છે કે, તેમણે જનતાના જનાદેશનો સ્વીકાર કર્યો છે અને હવે તેમનું રાજકીય ભવિષ્ય એનડીએ સાથે જોડાઈને આગળ વધવામાં છે.

તૃણમૂલ કોંગ્રેસ પાસે હાલમાં લોકસભામાં 28 સાંસદો અને રાજ્યસભામાં 12 સાંસદોનું સંખ્યાબળ છે. જો 20 સાંસદોના બળવાનો દાવો સાચો સાબિત થાય, તો મમતા બેનર્જીની રાજકીય કારકિર્દીનો આ સૌથી મોટો ઝટકો હશે.

ટીએમસીની અંદર ચાલી રહેલા આ મોટા સંકટની વચ્ચે સૌથી મોટો કાનૂની સવાલ દલબદલ વિરોધી કાયદા (Anti-Defection Law) ને લઈને ઊભો થઈ રહ્યો છે. ભારતીય બંધારણના નિયમો અનુસાર, લોકસભામાં કોઈપણ પક્ષના કુલ સાંસદોમાંથી ઓછામાં ઓછા બે-તૃતીયાંશ (2/3) સાંસદો, જો એકસાથે અલગ જૂથ બનાવે, તો જ તેમની સાંસદ સભ્યપદ બચી શકે છે અને તેમને કાનૂની રાહત મળે છે.

રાજકીય ગણિતની દ્રષ્ટિએ 20 સાંસદોનો આ આંકડો પક્ષપલટા વિરોધી કાયદાની મર્યાદા (19 સાંસદો) કરતાં વધુ હોવાથી, આ દાવો ખૂબ જ મહત્વનો માનવામાં આવે છે. જો આ આંકડો સાચો નીકળશે તો બળવાખોર સાંસદોનું સભ્યપદ રદ થશે નહીં, અને તેઓ સરળતાથી એનડીએ સરકારને ટેકો આપી શકશે.

આ સમગ્ર ઘટનાક્રમમાં સૌથી રસપ્રદ બાબત એ છે કે, અત્યાર સુધી લોકસભા સ્પીકરને પત્ર લખનારા એ 20 સાંસદોના નામ સત્તાવાર રીતે સામે આવ્યા નથી. આ જ કારણે રાજકીય વર્તુળોમાં ભારે રહસ્ય અને સંશય બનેલો છે. તૃણમૂલ કોંગ્રેસના સમર્થકો આ બળવાખોરોને ગદ્દાર અને સત્તાના ભૂખ્યા ગણાવી રહ્યા છે, જ્યારે બીજી તરફ ભાજપ બંગાળમાં આ સ્થિતિનો મોટો રાજકીય ફાયદો ઉઠાવવાની તૈયારી કરી રહ્યું છે. આગામી દિવસોમાં આ પત્ર સાર્વજનિક થતાં જ પશ્ચિમ બંગાળ અને કેન્દ્ર સરકારના રાજકારણમાં એક નવો વળાંક આવશે તે નિશ્ચિત છે.