દેશના 15થી વધુ રાજ્યોમાં શુક્રવારથી ગરમીથી રાહત મળવાની છે. રાજસ્થાન, મધ્યપ્રદેશ, બિહાર, યુપીમાં આગામી ત્રણ દિવસ વરસાદ પડી શકે છે. બિહારના 32 જિલ્લામાં ઓરેન્જ એલર્ટ જાહેર કરવામાં આવ્યું છે. 60kmphની ઝડપે પવન ફૂંકાઈ શકે છે.

જ્યારે રાજસ્થાનમાં જયપુર સહિત 11 જિલ્લામાં વાવાઝોડા સાથે વરસાદનું એલર્ટ છે. જેસલમેર, ફલોદી, ગંગાનગર, બીકાનેરમાં ગઈકાલે હીટવેવની સૌથી વધુ અસર જોવા મળી હતી. બુધવારે રાજસ્થાનનું શ્રીગંગાનગર દેશનું સૌથી ગરમ શહેર રહ્યું, અહીં તાપમાન 48°C ને પાર કરીને 48.2°C સુધી પહોંચ્યું.

મહારાષ્ટ્રના નાગપુરમાં છેલ્લા ત્રણ દિવસમાં 16 લોકોના મૃતદેહ રેલવે સ્ટેશન, રસ્તા, ફ્લાયઓવર નીચે સહિત અન્ય સાર્વજનિક સ્થળોએથી મળ્યા. પ્રશાસનને આશંકા છે કે હીટવેવના કારણે આ લોકોના મોત થયા છે. નાગપુરમાં બુધવારે પણ મહત્તમ તાપમાન 46°C રહ્યું.

પહાડી રાજ્યોની વાત કરીએ તો આજે ઉત્તરાખંડ અને હિમાચલ પ્રદેશમાં વરસાદ અને કરા પડી શકે છે.

દેશના 80-90% ભાગમાં 29 મે થી 5 જૂન સુધી પ્રી-મોન્સુન વરસાદ થઈ શકે છે. આ વરસાદ એટલા માટે મહત્વનો છે, કારણ કે મોન્સુન હજુ કેરળ પહોંચ્યું નથી. અહીં 14 નિર્ધારિત સ્થળોમાં સતત બે દિવસ 2.5 mm વરસાદ થવા પર મોન્સુન પહોંચ્યાની જાહેરાત કરવામાં આવે છે.

હવામાન વિભાગે 26 મેના રોજ ચોમાસું પહોંચવાનો અંદાજ લગાવ્યો હતો, પરંતુ અહીં ભેજ નબળો પડતાં ચોમાસું આગળ વધી શક્યું નથી. તેમજ, દક્ષિણ-મધ્ય અરબી સમુદ્રમાં ચક્રવાતી પરિભ્રમણથી પણ વાદળો નબળા પડ્યા છે.

યુરોપની હવામાન એજન્સી યુરોપિયન સેન્ટર ફોર મીડિયમ-રેન્જ વેધર ફોરકાસ્ટ્સે સેટેલાઇટ, દરિયાઈ અને વાતાવરણીય ડેટાને ભેગા કરીને ભારતમાં 15 દિવસના વરસાદની આગાહી કરી છે. તેમાં આગામી 8 દિવસમાં દક્ષિણ ભારત, પૂર્વ ભારત, પૂર્વોત્તર અને બંગાળની ખાડીના વિસ્તારોમાં વધુ વરસાદના સંકેતો છે.