PM મોદીએ શુક્રવારે કટરામાં કહ્યું, ‘દુર્ભાગ્યવશ, આપણો પાડોશી દેશ માનવતા વિરુદ્ધ છે, સંવાદિતા વિરુદ્ધ છે. તે એક એવો દેશ છે, જે ગરીબોની આજીવિકાની પણ વિરુદ્ધ છે. 22 એપ્રિલે પહેલગામમાં જે બન્યું એ એનું ઉદાહરણ છે. પાકિસ્તાને માનવતા અને કાશ્મીરિયત પર હુમલો કર્યો. અમે 6 જૂને તેનો વિનાશ કર્યો.’

આ પહેલાં PMએ જમ્મુના રિયાસી જિલ્લામાં ચિનાબ નદી પર બનેલા વિશ્વના સૌથી ઊંચા રેલવે ચિનાબ આર્ચ બ્રિજનું તિરંગો લહેરાવીને ઉદ્ઘાટન કર્યું હતું. આ પછી તેમણે કટરામાં અંજીબ્રિજ અને કાશ્મીરની પ્રથમ ટ્રેન વંદે ભારતને લીલી ઝંડી બતાવી.

ઉત્તરી રેલવે 7 જૂનથી કટરા-શ્રીનગર રૂટ પર વંદે ભારત ટ્રેન સેવા શરૂ કરશે. ટિકિટ બુકિંગ IRCTC વેબસાઇટ પર કરી શકાય છે. કટરા અને શ્રીનગર વચ્ચે અઠવાડિયામાં 6 દિવસ બે ટ્રેન દોડશે.

ઉત્તરી રેલવેએ જણાવ્યું હતું કે ટ્રેનમાં બે ટ્રાવેલ ક્લાસ છે. ચેર કારનું ભાડું રૂ.715 અને એક્ઝિક્યુટિવ ક્લાસનું ભાડું રૂ.1320 છે. હાલમાં ટ્રેનો ફક્ત બનિહાલ ખાતે જ રોકાશે. અન્ય સ્ટોપેજ અંગેનો નિર્ણય પછી લેવામાં આવશે.

આઝાદીનાં 77 વર્ષ પછી પણ હિમવર્ષાની મોસમમાં કાશ્મીર દેશના અન્ય ભાગોથી કપાયેલું રહે છે. રાષ્ટ્રીય ધોરીમાર્ગ-44 બંધ થવાને કારણે ખીણ સુધી પહોંચ અવરોધિત છે. આ ઉપરાંત જમ્મુથી કાશ્મીર સુધી રોડ માર્ગે મુસાફરી કરવામાં 8થી 10 કલાક લાગતા હતા. ટ્રેન શરૂ થતાં આ યાત્રા લગભગ ત્રણ કલાકમાં પૂર્ણ થશે.

PM મોદીએ કહ્યું કે ‘અમરનાથ યાત્રા 3 તારીખથી શરૂ થઈ રહી છે. ઈદનો માહોલ પણ છે. આ બધા પર આતંકવાદી હુમલાની કોઈ અસર થવાની નથી. નરેન્દ્ર મોદીએ વચન આપ્યું છે કે તેઓ વિકાસને રોકવા નહીં દે. જો કોઈ અવરોધ આવશે તો તેનો સામનો મોદી સામે કરવો પડશે. આજે 6 જૂન છે. એક મહિના પહેલાં, 6 મેની રાત્રે પાકિસ્તાન બરબાદ થઈ ગયું હતું. જો પાકિસ્તાન ક્યારેય ઓપરેશન સિંદૂર વિશે વિચારશે, તો તેને તેની હાર યાદ આવશે. પાકિસ્તાને ક્યારેય વિચાર્યું ન હતું કે ભારત તેમના ક્ષેત્રમાં આતંકવાદી છાવણીઓ પર હુમલો કરશે. આતંકની ઇમારતો ખંડેર બની ગઈ છે. પાકિસ્તાન ગભરાઈ ગયું છે. આ ગુસ્સામાં તેણે જમ્મુ અને પૂંછ સહિત ઘણા વિસ્તારોમાં ઘરો, મંદિરો, ગુરુદ્વારાઓ પર ગોળીબાર કર્યો છે. દેશના દરેક નાગરિકે તમે જે રીતે લડ્યા તે જોયું. દેશવાસીઓ તમારી સાથે પૂરી તાકાતથી ઉભા છે.’

PMએ કહ્યું, ‘આતંકવાદને કારણે જમ્મુ અને કાશ્મીરના લોકો માટે પોતાના પસંદગીના પ્રતિનિધિઓ પસંદ કરવાનું એક પડકાર બની ગયું હતું. વર્ષો સુધી આતંકવાદ સહન કર્યા પછી, જમ્મુ અને કાશ્મીરે એટલી બધી વિનાશ જોઈ હતી કે લોકોએ સપના જોવાનું બંધ કરી દીધું હતું. તેમણે આતંકવાદને પોતાનું ભાગ્ય સ્વીકારી લીધું હતું. અમે તેને બદલી નાખ્યું છે. આજે અહીંના યુવાનો પણ નવા સપના જોઈ રહ્યા છે. લોકો જમ્મુ અને કાશ્મીરને ફરીથી ફિલ્મો અને રમતગમતનું કેન્દ્ર બનતું જોવા માંગે છે. અમે માતા ખીર ભવાનીના મેળામાં પણ આ જોયું.’

PM મોદીએ ઉધમપુર-શ્રીનગર-બારામુલ્લા રેલ લિંક (USBRL) પ્રોજેક્ટ પર પ્રદર્શનની મુલાકાત લીધી. આ દરમિયાન જમ્મુ અને કાશ્મીરના મુખ્યમંત્રી ઓમર અબ્દુલ્લા, રેલવે મંત્રી અશ્વિની વૈષ્ણવ અને કેન્દ્રીય મંત્રી જીતેન્દ્ર સિંહ હાજર રહ્યા હતા. PMએ આ પ્રોજેક્ટ પર કામ કરતા લોકો સાથે પણ વાતચીત કરી.