1 એપ્રિલથી દેશના તમામ ટોલ પ્લાઝા કેશલેસ થઈ જશે. વાહનચાલકો માત્ર ફાસ્ટેગ અથવા UPI પેમેન્ટ દ્વારા જ ટોલ ટેક્સ ચૂકવી શકશે.

આ ઉપરાંત, આજે રાત્રે 12 વાગ્યા પછી દેશમાં ટેક્સ અને બેંકિંગ સંબંધિત 3 મોટા કામોની ડેડલાઇન પૂરી થઈ રહી છે. આવતીકાલથી ટેક્સ, રેલવે અને બજાર સંબંધિત 10 નિયમો પણ બદલાઈ જશે.

પબ્લિક પ્રોવિડન્ટ ફંડ (PPF), નેશનલ પેન્શન સ્કીમ (NPS) અથવા સુકન્યા સમૃદ્ધિ યોજના (SSY) ને ચાલુ રાખવા માટે દર વર્ષે ₹250 થી ₹500 સુધીની ન્યૂનતમ રકમ જમા કરવી ફરજિયાત છે. જો ખાતું બંધ થઈ ગયું હોય તો તેને ફરીથી ચાલુ કરાવવા માટે પેનલ્ટી લાગશે અને બેંકના ધક્કા ખાવા પડશે.

જૂની ટેક્સ રિજીમમાં ટેક્સ બચાવવા માટે રોકાણ કરવાનો આવતીકાલે છેલ્લો દિવસ છે. કલમ 80C હેઠળ ₹1.5 લાખ સુધીની છૂટ મેળવવા માટે તમે PPF, લાઇફ ઇન્શ્યોરન્સમાં રોકાણ કરી શકો છો.

આ ઉપરાંત, 80D હેઠળ હેલ્થ ઇન્શ્યોરન્સ પ્રીમિયમ અને મેડિકલ ખર્ચાઓ પર 1 લાખ સુધીની છૂટ મળે છે. 1 એપ્રિલ કે તે પછી કરવામાં આવેલું રોકાણ આવતા વર્ષના ખાતામાં ગણવામાં આવશે.

જો તમે નોકરીયાત છો, તો તમારે તમારી ઓફિસમાં રોકાણના પુરાવા જમા કરાવવા પડશે. આમાં ઘરના ભાડાની રસીદો, વીમા પ્રીમિયમની રસીદ, હોમ લોનના વ્યાજનું પ્રમાણપત્ર શામેલ છે.

જો તમે આ દસ્તાવેજો સમયસર જમા નહીં કરાવો, તો કંપની તમારા છેલ્લા પગારમાંથી વધુ TDS કાપી લેશે. તેને પાછું મેળવવા માટે ઇન્કમ ટેક્સ રિટર્ન ભરવા સુધી રાહ જોવી પડશે.

જો તમારી પાસે ગાડી છે તો આજે જ તમારી ગાડીમાં ફાસ્ટેગ એકાઉન્ટ એક્ટિવ કરી લો. જો તમે ફાસ્ટેગનો ઉપયોગ નથી કરતા, તો ખાતરી કરો કે તમારા સ્માર્ટફોનમાં UPI પેમેન્ટની સુવિધા ચાલુ હોય.

કાલથી ડિજિટલ પેમેન્ટ વિના ટોલ પ્લાઝા પર પહોંચવા પર તમારે દંડ ભરવો પડી શકે છે અથવા તમને પાછા મોકલી શકાય છે. કારણ કે, બધા ટોલ પર ફક્ત ફાસ્ટેગ અથવા UPI થી જ ટેક્સ ચૂકવી શકાશે.