વિપક્ષે લોકસભા સ્પીકર ઓમ બિરલા વિરુદ્ધ અવિશ્વાસ પ્રસ્તાવની નોટિસ રજૂ કરી દીધી છે. આ પહેલા બજેટ સત્રના 10મા દિવસે મંગળવારે લોકસભામાં પ્રશ્નકાળમાં કાર્યવાહી થઈ શકી નહોતી. 11 વાગ્યે ગૃહ શરૂ થતાની સાથે જ વિપક્ષે જોરદાર હંગામો કર્યો હતો. માત્ર 1 મિનિટ બાદ ચેર પર હાજર પીસી મોહને 12 વાગ્યા સુધી ગૃહ સ્થગિત કરી દીધું હતું.

બપોરે 12 વાગ્યે ગૃહની કાર્યવાહી ફરી શરૂ થઈ હતી. આ દરમિયાન પણ વિપક્ષનો હંગામો ચાલુ રહ્યો હતો. સાંસદો ‘વી વોન્ટ જસ્ટિસ’ના નારા લગાવતા રહ્યા. ત્યારબાદ ગૃહ 2 વાગ્યા સુધી સ્થગિત કરી દેવામાં આવ્યું હતું.

હંગામા વચ્ચે સંસદીય કાર્ય મંત્રી કિરેન રિજિજુએ વિપક્ષી સાંસદોને હાથ જોડીને કહ્યું કે બજેટ પર ચર્ચા થવા દો. આનાથી આપણા સૌનું નુકસાન થઈ રહ્યું છે. તમે દરરોજ આવીને હંગામો કરો છો, જેના કારણે કામ થઈ શકતું નથી.

બપોરે 2 વાગ્યે કાર્યવાહી શરૂ થઈ. સ્પીકરની ચેર પર ઓમ બિરલાની જગ્યાએ કેપી તેનેટ્ટી આવ્યા. તેમણે વિપક્ષને સામાન્ય બજેટ પર ચર્ચા શરૂ કરવા માટે જણાવ્યું.

આ પહેલા લોકસભાની બહાર બુક કોન્ટ્રોવર્સી પર રાહુલ ગાંધીએ કહ્યું કે કાં તો પૂર્વ આર્મી ચીફ જનરલ નરવણે જૂઠું બોલી રહ્યા છે અથવા તો પેંગ્વિન. રાહુલે કહ્યું કે તેમને વિશ્વાસ છે કે નરવણે જૂઠું નહીં બોલે.

રાહુલનું આ નિવેદન પબ્લિશિંગ કંપની પેંગ્વિન રેન્ડમ હાઉસ ઇન્ડિયાની એ સ્પષ્ટતા બાદ આવ્યું છે, જેમાં કહેવામાં આવ્યું છે કે નરવણેનું પુસ્તક હજુ સુધી પબ્લિશ થયું નથી. પબ્લિશિંગના તમામ અધિકારો અમારી પાસે છે.

પેંગ્વિન કંપનીએ જણાવ્યું હતું કે- અત્યાર સુધી પુસ્તકની ન તો કોઈ છાપેલી નકલ આવી છે અને ન તો કોઈ ડિજિટલ નકલ સામે આવી છે. અમારી તરફથી પુસ્તકનો કોઈ પણ ભાગ ક્યાંય પણ સાર્વજનિક કરવામાં આવ્યો નથી.

કંપનીની આ સ્પષ્ટતા એટલે આવી, કારણ કે પુસ્તકની અનઅધિકૃત નકલો લીક થવા અને ઓનલાઇન સર્ક્યુલેશનના દાવા કરવામાં આવ્યા છે. આ મામલે દિલ્હી પોલીસે FIR પણ નોંધી છે.

હકીકતમાં, રાહુલ ગાંધી પૂર્વ આર્મી ચીફનું પુસ્તક લઈને લોકસભા જઈ રહ્યા છે. સમગ્ર વિપક્ષ એ વાત પર અડગ છે કે તેમને ગૃહમાં બોલવા દેવામાં આવે. આ બાબતે જ કાર્યવાહી શરૂ થતાની સાથે જ સાંસદો સૂત્રોચ્ચાર કરે છે.

રાજ્યસભામાં સ્વાસ્થ્ય રાજ્ય મંત્રી અનુપ્રિયા પટેલે જણાવ્યું કે 3 ફેબ્રુઆરી સુધી દેશભરના આદિવાસી બહુમતી ધરાવતા વિસ્તારોમાં 6.83 કરોડથી વધુ લોકોની સિક્કલ સેલ એનિમિયા માટે સ્ક્રીનિંગ કરવામાં આવી છે. આમાંથી લગભગ 2.38 લાખ લોકો આ બીમારીથી સંક્રમિત જોવા મળ્યા, જ્યારે 19.32 લાખથી વધુ લોકોની ઓળખ કેરિયર તરીકે થઈ.

TMC સાંસદ અભિષેક બેનર્જીએ સંસદમાં કહ્યું કે BJPએ ત્રણ વાર બંગાળમાં હાર જોવી પડી છે. ચોથી વાર પણ જોશે. સરકારે બંગાળને ખૂબ જ ઓછું ફંડ આપ્યું. અમે તમારી સામે નહીં ઝૂકીએ.

તેમણે કહ્યું કે સરકાર એજન્સી દ્વારા અમને પરેશાન કરી રહી છે, પરંતુ અમે આનો પણ જવાબ આપીશું, તમે ફાઈલ સીઝ કરી રહ્યા છો, બજેટ રોકી રહ્યા છો પરંતુ બંગાળ આગળ વધશે. બંગાળના મજૂરોને મજૂર નહીં પણ શકમંદની જેમ જોવામાં આવી રહ્યા છે.

બેનર્જીએ કહ્યું કે આ લોકોને મણિપુર પહોંચતા 2 વર્ષ લાગી ગયા. તેઓ દરેક જગ્યાએ ગયા પરંતુ મણિપુર નહીં. કેટલીક વસ્તુઓ બજેટથી ઉપર હોય છે પણ તમે આ નહીં સમજો. તેઓ ભૂલી ગયા છે કે સંવિધાનની શરૂઆત ‘અમે ભારતના લોકો’થી થાય છે.

તેમણે કહ્યું કે તમે કોઈની સાથે ખોટું ન કરી શકો. સંવિધાન તમને રોકશે.