ટાટા ગ્રુપની કંપની ટાટા કન્સલ્ટન્સી સર્વિસિસ (TCS) ને નાણાકીય વર્ષ 2025-26 ના ત્રીજા ક્વાર્ટરમાં 10,657 કરોડ રૂપિયાનો નફો (કોન્સોલિડેટેડ નેટ પ્રોફિટ) થયો છે. વાર્ષિક ધોરણે તેમાં 14% નો ઘટાડો થયો છે. ગયા નાણાકીય વર્ષના સમાન ક્વાર્ટરમાં કંપનીને 12,380 કરોડ રૂપિયાનો નફો થયો હતો.

ઓક્ટોબર-ડિસેમ્બર ક્વાર્ટરમાં કંપનીએ ઓપરેશનમાંથી 67,087 કરોડ રૂપિયાની આવક (રેવન્યુ) જનરેટ કરી. વાર્ષિક ધોરણે આ 5% વધી છે. ગયા વર્ષના સમાન સમયગાળામાં કંપનીએ 63,973 કરોડની આવક જનરેટ કરી હતી.

વસ્તુઓ અને સેવાઓના વેચાણમાંથી મળતી રકમને રાજસ્વ અથવા રેવન્યુ કહેવાય છે. તેમાં ટેક્સ સામેલ નથી હોતો. કંપનીએ 12 જાન્યુઆરીએ ઓક્ટોબર-ડિસેમ્બર ક્વાર્ટરના પરિણામો જાહેર કર્યા.​​​​​​

કંપનીએ તેના શેરધારકોને પ્રતિ શેર પર 57 રૂપિયાનું ડિવિડન્ડ આપવાની જાહેરાત કરી છે. કંપનીઓ તેમના નફાનો અમુક હિસ્સો શેરહોલ્ડર્સને પણ આપે છે, તેને જ ડિવિડન્ડ કહેવાય છે.

TCS નો શેર આજે 12 જાન્યુઆરીએ 1.10% એટલે કે 35.20 રૂપિયા વધીને 3,243 રૂપિયા પર બંધ થયો. છેલ્લા એક મહિનામાં કંપનીનો શેર 1% વધ્યો છે. એક વર્ષમાં લગભગ 25% ઘટ્યો છે. કંપનીની માર્કેટ વેલ્યુ 11.71 લાખ કરોડ રૂપિયા છે.

ટાટા કન્સલ્ટન્સી સર્વિસિસ (TCS) ભારતની મલ્ટીનેશનલ ઇન્ફોર્મેશન ટેકનોલોજી (IT) કંપની છે. તે ટાટા ગ્રુપની એક સહાયક કંપની છે. TCSની સ્થાપના 1968માં ‘ટાટા કમ્પ્યુટર સિસ્ટમ્સ’ તરીકે થઈ હતી. 25 ઓગસ્ટ 2004ના રોજ TCS પબ્લિક લિસ્ટેડ કંપની બની.

2005માં ઇન્ફોર્મેટિક્સ માર્કેટમાં જનારી આ ભારતની પ્રથમ કંપની બની. એપ્રિલ 2018માં 100 અબજ ડોલર માર્કેટ કેપિટલાઇઝેશનવાળી દેશની પ્રથમ IT કંપની બની. તે 46 દેશોમાં 149 લોકેશન પર કામ કરે છે.