કેન્દ્રીય નાગરિક ઉડ્ડયન મંત્રી રામ મોહન નાયડુએ મંગળવારે નેક્સ્ટ જનરેશન સિવિલ હેલિકોપ્ટર ધ્રુવ NGને લીલી ઝંડી આપી હતી. તેને હિન્દુસ્તાન એરોનોટિક્સ લિમિટેડ (HAL) દ્વારા બનાવવામાં આવ્યું છે.

HALથી ઉડાન ભરતા પહેલા, મંત્રી હેલિકોપ્ટરની સિસ્ટમ અને સુવિધાઓ વિશે માહિતી મેળવવા માટે પાયલટ સાથે કોકપિટમાં પણ બેઠા હતા.

અધિકારીઓના મતે, ધ્રુવ NG એક અત્યાધુનિક 5.5-ટન, હળવું ટ્વીન-એન્જિન, મલ્ટી-રોલ હેલિકોપ્ટર છે જેને ભારતીય ભૂપ્રદેશની વિવિધ અને મુશ્કેલ જરૂરિયાતોને પહોંચી વળવા માટે ડિઝાઇન કરવામાં આવ્યું છે.

ધ્રુવ હેલિકોપ્ટર અત્યાર સુધી માત્ર સશસ્ત્ર દળોની જરૂરિયાતો પૂરી કરતું હતું. હવે સામાન્ય નાગરિકો પણ તેમાં મુસાફરી કરી શકશે. તેનો ઉદ્દેશ્ય મેડિકલ ઇમરજન્સી, પર્યટન, દૂરના વિસ્તારોની કનેક્ટિવિટી અને આપત્તિ રાહત જેવા ક્ષેત્રોમાં હેલિકોપ્ટર સેવાઓને પ્રોત્સાહન આપવાનો છે.

આ પહેલા, ભારતીય સેના ધ્રુવ હેલિકોપ્ટરનો ઉપયોગ પર્વતો, રણ અને દરિયાઈ વિસ્તારોમાં તેના ઓપરેશન માટે કરતી હતી.

HAL ઝડપથી વધી રહેલા સિવિલ અને યુટિલિટી હેલિકોપ્ટર બજાર પર ધ્યાન કેન્દ્રિત કરી રહી છે. સૂત્રો અનુસાર, એર એમ્બ્યુલન્સ, ઓફશોર ઓપરેશન્સ, આપત્તિ રાહત અને પ્રાદેશિક કનેક્ટિવિટી જેવા ક્ષેત્રોમાં માંગ વધી રહી છે. આને ધ્યાનમાં રાખીને, સરકારી એરોસ્પેસ કંપની સૈન્ય પ્લેટફોર્મથી આગળ પોતાના કાર્યક્ષેત્રનો વિસ્તાર કરવા માંગે છે.

ધ્રુવ-NG ની પ્રથમ ઉડાનને ભારતના સ્વદેશી રોટરી-વિંગ વિમાન કાર્યક્રમમાં એક મહત્વપૂર્ણ સિદ્ધિ માનવામાં આવી રહી છે. આ સાથે, તેને સિવિલ એવિએશન માર્કેટમાં HALની લાંબા ગાળાની વ્યૂહરચનાની દિશામાં એક મહત્વપૂર્ણ પગલા તરીકે જોવામાં આવી રહ્યું છે.

ભારતમાં સિવિલ હેલિકોપ્ટરની સંખ્યા ઘણી ઓછી છે. સમગ્ર દેશમાં હાલમાં લગભગ 300 થી 400 સિવિલ હેલિકોપ્ટર જ કાર્યરત છે. તેની સરખામણીમાં અમેરિકામાં 12,000થી વધુ નાગરિક હેલિકોપ્ટર છે.

બ્રાઝિલ જેવા નાના દેશમાં પણ લગભગ 2,500 હેલિકોપ્ટર છે, જ્યારે ચીનમાં 1,200થી વધુ સિવિલ હેલિકોપ્ટર કાર્યરત છે. મોટી વસ્તી અને ભૌગોલિક વિસ્તારને જોતાં ભારતમાં આ સેક્ટરના વિકાસની ઘણી શક્યતાઓ છે.