આવતીકાલથી, 1 ઓક્ટોબરથી, તત્કાલ ટિકિટની જેમ, જનરલ રિઝર્વેશન ટિકિટ બુક કરવા માટે ઈ-આધાર ચકાસણી ફરજિયાત બનશે. ભારતીય રેલવેએ 14 સપ્ટેમ્બરના રોજ આ જાહેરાત કરી હતી.

રેલવે મંત્રાલયના જણાવ્યા અનુસાર, IRCTC વેબસાઇટ અથવા એપ પર જનરલ રિઝર્વેશન શરૂ થયાના પ્રથમ 15 મિનિટમાં ટિકિટ બુક કરવા માટે આધાર વેરિફિકેશન જરૂરી રહેશે. આનાથી નકલી ID, એજન્ટો દ્વારા ટિકિટ બ્લેક માર્કેટિંગ અને બોટ્સ દ્વારા બુકિંગ પર રોક લાગશે.

જો તમારું IRCTC એકાઉન્ટ પહેલાથી જ આધાર સાથે લિંક થયેલું હોય, તો બુકિંગ સરળ બનશે. રાહ જોવાનો સમય ઓછો થશે, અને ટિકિટ ઝડપથી કન્ફર્મ થશે. રેલવેના કોમ્પ્યુટરાઈઝ્ડ PRS કાઉન્ટર પર જનરલ રિઝર્વેશન ટિકિટ બુક કરાવવાનું જૂનું સમયપત્રક એ જ રહેશે. વધુમાં, અધિકૃત રેલવે ટિકિટિંગ એજન્ટો માટે પહેલા દિવસની ટિકિટ બુકિંગ પર 10 મિનિટની મર્યાદા યથાવત રહેશે.

ઘણી વખત એવું જોવા મળ્યું છે કે તત્કાલ ટિકિટો લોન્ચ થતાંની સાથે જ થોડીવારમાં જ વેચાઈ જાય છે, કારણ કે દલાલો અને નકલી એજન્ટો સોફ્ટવેર અથવા ખોટી પદ્ધતિઓનો ઉપયોગ કરીને ટિકિટ બુક કરાવતા હતા. એના કારણે સામાન્ય મુસાફરોને ટિકિટ મેળવવામાં મુશ્કેલી પડી હતી.

નવા નિયમોનો હેતુ એ છે કે ફક્ત સાચા મુસાફરોને જ ટિકિટ બુક કરવાની તક મળે અને છેતરપિંડી અટકાવી શકાય. આધાર ચકાસણી ખાતરી કરશે કે ટિકિટ તે વ્યક્તિ દ્વારા બુક કરવામાં આવી રહી છે, જેનો આધાર નંબર નોંધાયેલો છે. એજન્ટોને પ્રથમ 30 મિનિટ માટે એસી અને નોન-એસી બંને વર્ગો માટે ટિકિટ બુક કરવાની મંજૂરી આપવામાં આવશે નહીં.

જો તમે IRCTC વેબસાઇટ અથવા એપ પરથી તત્કાલ ટિકિટ બુક કરાવી રહ્યા છો, તો તમારે પહેલા તમારા આધાર નંબરને તમારા IRCTC એકાઉન્ટ સાથે લિંક કરવો પડશે.

જ્યારે તમે ટિકિટ બુક કરવા જશો ત્યારે તમારા રજિસ્ટર્ડ મોબાઇલ નંબર પર એક OTP મોકલવામાં આવશે. આ OTP દાખલ કર્યા પછી જ તમારું બુકિંગ કન્ફર્મ થશે. કાઉન્ટર પર પણ આ જ પ્રક્રિયા અનુસરવામાં આવશે, જ્યાં તમારે તમારો આધાર નંબર આપવો પડશે અને OTP વેરિફાઇ કરવો પડશે.

હાલમાં નવા નિયમો મુજબ આધાર વેરિફિકેશન જરૂરી છે. જો તમારી પાસે આધાર કાર્ડ નથી, તો તત્કાલ ટિકિટ બુક કરવામાં મુશ્કેલી પડી શકે છે. રેલવે દ્વારા આપવામાં આવેલી માહિતીમાં આધાર વિના ટિકિટ બુક કરવાની બીજી કોઈ પદ્ધતિનો ઉલ્લેખ કરવામાં આવ્યો નથી.

રેલવે મંત્રાલયે તત્કાલ ટિકિટ બુકિંગના નિયમો અંગે એક સૂચના બહાર પાડી.