ભાગેડુ હીરા વેપારી મેહુલ ચોક્સીના બેલ્જિયમથી ભારત પ્રત્યાર્પણની કાર્યવાહી 15 સપ્ટેમ્બરથી શરૂ થશે. સમાચાર એજન્સી PTI દ્વારા આ માહિતી આપવામાં આવી છે. ચોક્સી પર પંજાબ નેશનલ બેંક સાથે ₹13,850 કરોડની છેતરપિંડીનો આરોપ છે.

આ કેસની સુનાવણી બેલ્જિયમની ફેડરલ કોર્ટમાં થશે. આમાં, CBI અને વિદેશ મંત્રાલય (MEA)ના વકીલો ભારત વતી પોતાનો પક્ષ રજૂ કરશે. 8 સપ્ટેમ્બરના રોજ, ભારતે બેલ્જિયમને લેખિત ગેરંટી આપી છે. કેન્દ્રએ બેલ્જિયમ સરકારને એક પત્રમાં જણાવ્યું હતું કે, ચોક્સીને મુંબઈની આર્થર રોડ જેલના બેરેક નંબર 12માં રાખવામાં આવશે. એક સેલમાં 6 લોકોની ક્ષમતા છે.

પત્રમાં કહેવામાં આવ્યું છે કે જો ચોક્સીને બેલ્જિયમથી ભારત લાવવામાં આવશે, તો તેની સાથે માનવીય વર્તન કરવામાં આવશે. તેને 14થી વધુ સુવિધાઓની ખાતરી આપવામાં આવી છે. જેમાં 24 કલાક તબીબી સંભાળ, ચોખ્ખુ પાણી, સારો ખોરાક અને નિષ્ણાત ડૉક્ટરની સુવિધાઓનો સમાવેશ થાય છે.

જોકે, ચોક્સીના વકીલે તેમની ધરપકડને ગેરકાયદેસર ગણાવી હતી અને જામીન માગ્યા હતા, પરંતુ કોર્ટે તેને ફગાવી દીધા હતા. ચોક્સીના વકીલ તેમના ક્લાયન્ટની સ્વાસ્થ્ય સમસ્યાઓનો હવાલો આપી રહ્યા છે, પરંતુ ભારતનું કહેવું છે કે દેશમાં પણ સારવાર થઈ શકે છે. જો કોર્ટ ભારતના પુરાવા સાથે સહમત થાય, તો ચોક્સીને ભારત મોકલી શકાય છે.

મીડિયા રિપોર્ટ્સ અનુસાર, ચોક્સીના વકીલો પણ તેની મુક્તિ માટે અપીલ દાખલ કરવાની તૈયારી કરી રહ્યા છે. આમાં તેઓ તબીબી દલીલો સહિત અન્ય ઘણી દલીલો રજૂ કરી શકે છે. જો બેલ્જિયમ કોર્ટ આ દલીલો સ્વીકારે તો મુક્તિ શક્ય બની શકે છે.

• મેડિકલ ગ્રાઉન્ડ: વકીલના મતે ચોક્સીને કેન્સર છે. આવી સ્થિતિમાં તેના ભાગવાની કોઈ શક્યતા નથી.
• પુરાવાનો અભાવ: જો CBI અને વિદેશ મંત્રાલય મજબૂત પુરાવા રજૂ કરવામાં નિષ્ફળ જાય, તો કોર્ટ ચોક્સીને મુક્ત કરી શકે છે.
• માનવ અધિકારો અને જેલની સ્થિતિ: બેલ્જિયમની કોર્ટ ભારતીય જેલોની સ્થિતિ અને ચોક્સીના માનવ અધિકારોના રક્ષણ અંગે સવાલો ઉઠાવી શકે છે. જો ભારત આ ચિંતાઓને દૂર કરવામાં નિષ્ફળ જાય, તો પ્રત્યાર્પણ અટકાવી શકાય છે, જેનાથી મુક્તિનો માર્ગ મોકળો થઈ શકે છે.

ભારતીય તપાસ એજન્સીઓની પ્રત્યાર્પણ અપીલ પર 12 એપ્રિલે ચોક્સીની બેલ્જિયમમાં ધરપકડ કરવામાં આવી હતી. તે અને તેનો ભત્રીજો નીરવ મોદી PNB છેતરપિંડી કેસમાં મુખ્ય આરોપી છે. ભાગેડુ નીરવ મોદી લંડનમાં છે. તેના પ્રત્યાર્પણ માટે પણ પ્રયાસો ચાલુ છે. બંને 2018માં ભારત છોડીને ગયા હતા.