NDAના ઉપરાષ્ટ્રપતિ પદના ઉમેદવાર સીપી રાધાકૃષ્ણને ઉમેદવારી નોંધાવી છે. આ દરમિયાન તેમની સાથે પીએમ મોદી, ગૃહમંત્રી અમિત શાહ, રક્ષા મંત્રી રાજનાથ સિંહ અને ભાજપ અધ્યક્ષ જેપી નડ્ડા સહિત ઘણા નેતાઓ હાજર રહ્યા હતા. આ પહેલા તેમણે સંસદ પરિસરમાં રહેલી ગાંધી પ્રતિમાને પુષ્પાંજલી અર્પણ કરી હતી. ઉપરાષ્ટ્રપતિ પદ માટે ચૂંટણી 9 સપ્ટેમ્બરે યોજાવાની છે.

17 ઓગસ્ટના રોજ યોજાયેલી ભાજપ સંસદીય દળની બેઠકમાં સીપી રાધાકૃષ્ણનના નામ પર સર્વસંમતિ બની હતી. ભાજપ અધ્યક્ષ જેપી નડ્ડાએ પત્રકાર પરિષદમાં રાધાકૃષ્ણનના નામની જાહેરાત કરી હતી.

તેમનો મુકાબલો વિપક્ષ ગઠબંધનના ઉમેદવાર નિવૃત્ત સુપ્રીમ કોર્ટના જસ્ટિસ બી સુદર્શન રેડ્ડી સામે થશે. ખાસ વાત એ છે કે બંને ઉમેદવારો દક્ષિણના છે. રેડ્ડી 21 ઓગસ્ટે પોતાનું ઉમેદવારીપત્ર ભરશે.

ઉપરાષ્ટ્રપતિની ચૂંટણી માટે મતદાન 9 સપ્ટેમ્બરે થશે. મતગણતરી પણ તે જ દિવસે થશે. ઉમેદવારી નોંધાવવાની છેલ્લી તારીખ 21 ઓગસ્ટ છે. 25 ઓગસ્ટ સુધી ઉમેદવારી પાછી ખેંચી શકાશે.

ખરેખરમાં, ઉપરાષ્ટ્રપતિની ચૂંટણી 21 જુલાઈની રાત્રે જગદીપ ધનખડના અચાનક રાજીનામાને કારણે થઈ રહી છે. 74 વર્ષીય ધનખડનો કાર્યકાળ 10 ઓગસ્ટ, 2027 સુધીનો હતો.

I.N.D.I.Aએ ઉપરાષ્ટ્રપતિની ચૂંટણી માટે સુપ્રીમ કોર્ટના નિવૃત્ત જજ બી સુદર્શન રેડ્ડીને પોતાના ઉમેદવાર જાહેર કર્યા છે. તેમનો મુકાબલો NDAના ઉમેદવાર સીપી રાધાકૃષ્ણન સામે થશે.

79 વર્ષીય રેડ્ડી ગુવાહાટી હાઈકોર્ટના ચીફ જસ્ટિસ અને ગોવાના પ્રથમ લોકાયુક્ત રહી ચૂક્યા છે. તેઓ આંધ્રપ્રદેશના છે. 2007માં તેમને સુપ્રીમ કોર્ટના જજ તરીકે નિયુક્ત કરવામાં આવ્યા હતા.

ખાસ વાત એ છે કે બંને ઉમેદવારો દક્ષિણના છે. નિવૃત્ત જસ્ટિસ રેડ્ડી આંધ્રપ્રદેશના છે, જ્યારે સીપી રાધાકૃષ્ણન તમિલનાડુના છે. રાધાકૃષ્ણન 20 ઓગસ્ટે પોતાની ઉમેદવારી નોંધાવી જ્યારે રેડ્ડી 21 ઓગસ્ટે પોતાની ઉમેદવારી નોંધાવશે.

લોકસભામાં કુલ સાંસદોની સંખ્યા 542 છે. એક બેઠક ખાલી છે. NDA પાસે 293 સાંસદ છે. તેવી જ રીતે રાજ્યસભામાં 245 સાંસદો છે. 5 બેઠક ખાલી છે. NDA પાસે 129 સાંસદો છે. ધારો કે ઉપરાષ્ટ્રપતિ માટે નામાંકિત સભ્યો પણ NDA ઉમેદવારની તરફેણમાં મતદાન કરશે.

આ રીતે, શાસક ગઠબંધનને કુલ 422 સભ્યોનું સમર્થન છે. બહુમતી માટે 391 સાંસદના સમર્થનની જરૂર છે. ઓગસ્ટ 2022માં NDA ઉમેદવાર જગદીપ ધનખરને 528 મત મળ્યા હતા તેમજ વિપક્ષી ઉમેદવાર માર્ગારેટ આલ્વાને ફક્ત 182 મત મળ્યા હતા. ત્યારે 56 સાંસદોએ મતદાન કર્યું ન હતું.