હવેથી 10 વર્ષથી વધુ ઉંમરના બાળકો પોતાના બેન્ક એકાઉન્ટને સ્વતંત્ર રીતે ઓપરેટ કરી શકશે. કેન્દ્રીય રિઝર્વ બેંકે બેંકોને આ મામલે નિર્દેશ આપ્યા છે. રિઝર્વ બેંકે કહ્યું છે કે, 10 વર્ષથી વધુની ઉંમરના સગીરોને સ્વતંત્ર રીતે સેવિંગ/ફિક્સ્ડ ડિપોઝિટ એકાઉન્ટ ખોલવા અને ઓપરેટ કરવાની મંજૂરી આપી દીધી છે. જણાવી દઈએ કે, સામાન્ય રીતે સગીરનું ખાતું વાલીઓ પોતે જ ચલાવતા હોય છે.

RBIએ કોમર્શિયલ બેંકો અને સહકારી બેંકોને જારી કરાયેલા પરિપત્રમાં જણાવ્યું હતું કે, કોઈપણ ઉંમરના સગીરોને તેમના કુદરતી અથવા કાનૂની વાલી દ્વારા બચત અને ફિક્સ્ડ ડિપોઝિટ ખાતા ખોલવા અને ઓપરેટ કરવાની મંજૂરી આપી શકાય છે. તેમને તેમની માતાને વાલી રાખીને આવા ખાતા ખોલવાની મંજૂરી પણ મળી શકે છે. બેંકો તેમની જોખમ વ્યવસ્થાપન નીતિને ધ્યાનમાં રાખીને રકમ અને શરતો નક્કી કરી શકે છે. આ સંદર્ભમાં જે પણ નિયમો અને શરતો નક્કી કરવામાં આવશે, ખાતાધારકને તેની જાણ કરવામાં આવશે.

પરિપત્રમાં કહેવામાં આવ્યું છે કે બેંકો તેમની રિસ્ક મેનેજમેન્ટ પોલિસી, ઉત્પાદન અને ગ્રાહકના આધારે સગીર ખાતાધારકોને ઇન્ટરનેટ બેંકિંગ, એટીએમ/ડેબિટ કાર્ડ, ચેક બુક સુવિધા વગેરે જેવી વધારાની સુવિધાઓ પ્રદાન કરવા માટે સ્વતંત્ર છે. બેંકોએ ખાતરી કરવી પડશે કે સગીરોના ખાતા, ભલે તે સ્વતંત્ર રીતે ચલાવવામાં આવતા હોય કે વાલી દ્વારા ઓવરડ્રો ન થાય અને હંમેશા સંતુલન જાળવી રાખે. વધુમાં બેંકો સગીરોના ડિપોઝિટ ખાતા ખોલવા માટે ગ્રાહકની યોગ્ય તપાસ કરવાનું ચાલુ રાખશે. 

RBIએ બેંકોને 1 જુલાઈ, 2025 સુધીમાં સુધારેલા માર્ગદર્શિકા અનુસાર નવી નીતિઓ બનાવવા અથવા હાલની નીતિઓમાં સુધારો કરવા જણાવ્યું છે.