8 માર્ચના રોજ આંતરરાષ્ટ્રીય મહિલા દિવસ સમગ્ર વિશ્વમાં ઊજવવામાં આવે છે. આંતરરાષ્ટ્રીય મહિલા દિવસની આડમાં સાયબર અપરાધીઓએ મહિલાઓનો પર્સનલ ડેટા ચોરવા માટે ડિમાર્ટના નામની ફેક લિંક વાઇરલ કરી છે, જેના માધ્યમથી અનેક લોકોને આ લિંક ફોર્વર્ડ કરવાનું કહી ગિફ્ટ બોક્સ ખોલવાનું કહી અલગ-અલગ ટાસ્ક આપી છેતરપિંડી આચરવામાં આવી રહી છે. તો જાણે સાયબર એક્સપર્ટ પાસેથી કે આ પ્રકારની લિંક આવે તો શું સાવધાની રાખવી અને છેતરપિંડીથી કેવી રીતે બચવું.

આંતરરાષ્ટ્રીય મહિલા દિવસની આડમાં સાયબર અપરાધીઓ દ્વારા જે ફેક લિંક વાઇરલ કરી છે, એ લિંકના માધ્યમથી સાયબર અપરાધીઓ તમામ મહિલાઓને જણાવી રહ્યા છે કે આંતરરાષ્ટ્રીય મહિલા દિવસની ઉજવણી નિમિત્તે ડિમાર્ટ તરફથી જે મહિલાઓ આ લિંક પર ક્લિક કરશે અને મિસ્ટ્રી બૉક્સ પર ક્લિક કરશે તો તે 6000 રૂપિયા જીતશે. એકવાર 6000 રૂપિયા જીતી લીધા બાદ તે મહિલાએ રૂપિયા મેળવવા માટે ફરજિયાતપણે ડિમાર્ટના નામની ફેક લિંકને 5 વ્હોટ્સએપ ગ્રુપ્સ પર કાં તો 20 વ્હોટ્સએપ યુઝર્સને મોકલવી પડશે. ત્યાર બાદ એક રજિસ્ટ્રેશન ફોર્મ ફરજિયાતપણે ભરવું પડશે, જેમાં પર્સનલ ડેટા, જેમ કે નામ, સરનામું, મોબાઈલ નંબર જેવી વિગતો ભરવી પડશે. ત્યાર બાદ પાંચથી સાત દિવસમાં 6000 રૂપિયા તેમને મળી શકશે.

આ અંગે સાયબર એક્સપર્ટ મયૂર ભુસાવળકરે જણાવ્યું હતું કે મારા દ્વારા ફેક લિંકનું 360 ડિગ્રી ટેક્નિકલ એનાલિસિસ કરતાં એ બાબત સામે આવી કે આ વેબસાઈટને માર્ચ મહિનાની ત્રીજી તારીખે જ હોસ્ટ કરવામાં આવી છે. ત્યાર બાદ એને વ્હોટ્સએપ થકી વાઇરલ કરવામાં આવી છે. એના ડોમેઇનને ચેક કરતાં સર્વર લોકેશન, અક્ષાંશ અને રેખાંશની માહિતી તેમજ સ્થળની માહિતી અનનોન રાખી હતી.

તેણે વધુમાં કહ્યું હતું કે લિક પર ક્લિક કરનારને મુખ્ય ચાર પ્રશ્નો પૂછવામાં આવે છે, જેમાં શું તમે ડિમાર્ટને ઓળખો છો? તમારી ઉંમર શું છે? તમે ડિમાર્ટ માટે શું વિચારો છો? આવા ચાર પ્રશ્નો પૂછવામાં આવે છે. ત્યાર બાદ મિસ્ટરી બોક્સ યુઝર સામે રજૂ કરવામાં આવે છે અને યુઝરને તેના પર ક્લિક કરવાનું હોય છે. તેનું અલ્ગોરિધમ એ પ્રકારે સેટ કરેલુ હોય છે કે કોઈપણ યુઝર બીજીવાર ક્લિક કરશે, ત્યાર બાદ જ એ 6000 રૂપિયા મિસ્ટરી બોક્સમાંથી બહાર આવશે. તેને મેળવવા માટે યુઝરે આ ફેક લિંકને પાંચ વ્હોટ્સએપ ગ્રુપ્સ અથવા 20 જણાને વ્હોટ્સએપ પર મોકલવી પડશે.

તેણે વધુમાં કહ્યું હતું કે અહીં પણ એવું અલ્ગોરિધમ નિર્ધારિત કરવામાં આવ્યું છે. યુઝરને એ 90 જણને વ્હોટ્સએપ પર મોકલ્યા બાદ જ સ્ટેટસ બાર 100 ટકા પૂર્ણ થાય છે. આ પ્રકારની તમામ બાબત પૂર્ણ થયા બાદ યુઝર્સને અંતિમ તબક્કામાં લઈ જવામાં આવે છે, ત્યાં સાયબર અપરાધીઓ ગેમ રમે છે. ત્યાં યુઝર પાસે વેરિફિકેશન મેથડ અનુસરવાનું કહેવામાં આવે છે, જેમાં તેને મોબાઈલ ડિવાઈસ વેરિફાય કરવાનું, સર્વે લિંક પર ક્લિક કરવાનું તેમજ ફોન વેરિફિકેશન કરવાનું કહેવામાં આવે છે. તે થકી સાયબર અપરાધી યુઝરના મોબાઈલને નિયંત્રણ મેળવવાનો પ્રયત્ન કરે છે. યુઝરનું નામ, સરનામું અને મોબાઈલ નંબર જેવી અંગત માહિતી મેળવી લેવામાં આવે છે.