પશ્ચિમ કચ્છના પૌરાણિક તીર્થધામ નારાયણ સરોવર-કોટેશ્વર ખાતે પ્રખ્યાત કથાકાર મોરારિબાપુની રામકથાના બીજા દિવસે ભવ્ય આયોજન થયું. હજારો રામભક્તોની ઉપસ્થિતિમાં રામાયણની ચોપાઈ અને સૂર-સંગીત સાથેની રામધૂનથી સમગ્ર વાતાવરણ ભક્તિમય બની ગયું હતું.

કથા દરમિયાન મોરારિબાપુએ કચ્છની વિશેષતાઓનું વર્ણન કરતાં સફેદ રણ, ડુંગર, દરિયો, મા આશાપુરા અને જેસલ-તોરલની વાત કરી. તેમણે કચ્છી લોકોની ખુમારી અને દાતારીની પ્રશંસા કરી, સાથે ભૂકંપ બાદ કચ્છે કરેલા પુનરુત્થાનની સરાહના કરી હતી. બાપુએ હનુમાનજીના વિવિધ સ્વરૂપો વિશે વિશેષ ચર્ચા કરી, જેમાં તેમણે શાંત અને ધ્યાનમગ્ન સ્વરૂપની પૂજા કરવાનું મહત્વ સમજાવ્યું. વિદ્યાર્થીઓને રામાયણ અને ભગવદ્ ગીતા સાથે રાખવાની પ્રેરણા આપી હતી.

કાર્યક્રમમાં મૂળદાસજી બાપુ, પૂર્વ રાજ્યમંત્રી વાસણભાઈ આહીર સહિત અનેક મહાનુભાવો ઉપસ્થિત રહ્યા. મનોરથી પ્રવીણભાઈ તન્ના પરિવાર દ્વારા ભોજન પ્રસાદની વ્યવસ્થા કરવામાં આવી છે. સુરક્ષા અને ટ્રાફિક વ્યવસ્થા માટે પશ્ચિમ કચ્છ પોલીસના 150થી વધુ જવાનો તૈનાત છે.