રાજ્યમાં અને ખાસ કરીને સૌરાષ્ટ્ર કચ્છમાં કડકડતી ઠંડી પડી રહી છે. આગામી ચોવીસ કલાક દરમિયાન પણ સૌરાષ્ટ્રના કચ્છના નલિયા, રાજકોટ અને પોરબંદરમાં કોલ્ડવેવની આગાહી કરવામાં આવી છે.

છેલ્લા 24 કલાકમાં રાજકોટ અને નલિયામાં કોલ્ડવેવ જોવા મળી છે. જેમાં નલીયામાં તાપમાનનો પારો 6.4 ડિગ્રી સેલ્સિયસ અને રાજકોટમાં 9.5 ડિગ્રી સેલ્સિયસ રહ્યો હતો. છેલ્લા 24 કલાકમાં અમદાવાદમાં 13.4 ડિગ્રી સેલ્સિયસ અને ગાંધીનગરમાં 13.3 ડિગ્રી સેલ્સિયસ નોંધાયું હતું. આવનારા 24 કલાકમાં નલિયા, પોરબંદર અને રાજકોટમાં કોલ્ડવેવ જોવા મળી શકે છે. જેમાં તાપમાન નલિયામાં 06 ડિગ્રી સેલ્સિયસ, રાજકોટમાં 08 ડિગ્રી સેલ્સિયસ અને પોરબંદરમાં 11 ડિગ્રી સેલ્સિયસ રહેવાનું અનુમાન છે.

લાનિનોની અસર તળે દેશની ઉત્તરી દિશાએ પડેલી ભારે હિમ વર્ષાની અસર હેઠળ છેક કચ્છ સુધી પહોંચતા ડંખિલા ઠારથી જિલ્લાનું વાતાવરણ સતત ઠંડુંગાર બની રહ્યું છે. જિલ્લાની ટોચે આવેલા નલિયામાં ન્યૂનતમ તાપમાનનો પારો 6.4 ડીગ્રી સાથે સતત એકલ આંકમાં નોંધાઈ રહેતા આજે વધુ એક વખત નલિયા રાજ્યનું શિત મથક તરીકે જાહેર થયું છે, તો જિલ્લા મથક ભુજ શહેરના તાપમાનનો પારો પણ એકલ આંક તરફ સરકી રહ્યો હોય તેમ લાગી રહ્યું છે. આજે ભુજનું તાપમાન 10.2 ડિગ્રીના સ્તરને સ્પર્શ કરી ગયું હતું. ભારે ઠંડીના કારણે લોકો સાથે હવે પશુઓ ઉપર પણ શિયાળાની અસર વર્તાઈ રહી છે. ગાય અને ભેંસના દૂધની માત્રામાં રોજિંદો ઘટાડો નોંધાઈ રહ્યો છે. લોકો ગરમ વસ્ત્ર, ખાણીપીણી અને તાપણા નો સહારો લઈ રહ્યા છે.તો વહેલી સવારે શાળાએ જતા છાત્રાઓ સંપૂર્ણપણે ગરમ વસ્ત્રોમાં સજ્જ થયેલા જોવા મળી રહ્યા છે.

કચ્છના નલિયામાં વહેલી પરોઢે ન્યૂનતમ તાપમાનનો પારો 6.4 ડિગ્રીએ પહોંચી ગયો હતો. ઠંડીના કારણે લોકોને રોજિંદા કર્યોમાં ભારે હાલાકી પડી રહી છે. બજારોમાં લોકોની હાજરી પણ ઘટી જવા પામી છે. એજ પ્રકારે ભુજમાં શરૂ થયેલી ગરમ વસ્ત્રોની બજાર પહેલા શુષ્ક રહ્યાં બાદ હવે લોકોની ભીડથી ગાજી રહી છે. ગત વર્ષની તુલતાએ આ ડિસેમ્બર માસમાં ઠંડીનું જોર વિશેષરૂપે નોંધાઈ રહ્યુ છે. જેની સૌથી વધુ અસર સવારે કામસર નીકળતા ધંધાર્થીઓ અને શાળાએ જતા બાળકો ઉપર વર્તાઈ રહી છે.