દેશની દરિયાઈ સુરક્ષા ક્ષમતાને વધારવા અદાણી ડિફેન્સ અને એરોસ્પેસ દ્વારા ભારતીય નૌકાદળને બીજું દૃષ્ટિ-10 સ્ટારલાઈનર સર્વેલન્સ ડ્રોન સોંપવામાં આવ્યું છે. દ્રષ્ટિ 10 સ્ટારલાઇનર ડ્રોન (UAV) હૈદરાબાદ સ્થિત અદાણી ગ્રૂપના એકમ અદાણી ડિફેન્સ એન્ડ એરોસ્પેસ ખાતે બનાવવામાં આવ્યું છે. દૃષ્ટિ-10 એક હાઇ-ટેક ઇન્ટેલિજન્સ, સર્વેલન્સ અને રિકોનિસન્સ (ISR) પ્લેટફોર્મ છે. તેની ટકાઉ ક્ષમતા 36 કલાક અને પેલોડ ક્ષમતા 450 કિલો છે.

સૂત્રોના જણાવ્યા મુજબ ગુજરાતના પોરબંદરમાં ઈન્ડિયન નેવીની મેરીટાઇમ કામગીરીમાં બીજા UAVનો સમાવેશ કરવાની શરૂઆત કરવામાં આવી હતી. તે ઇઝરાયેલના હર્મેસ 900 મધ્યમ-ઊંચાઇવાળા UAV નું સંસ્કરણ છે અને લાંબા ગાળાની કામગીરીમાં ટકી રહેવા સક્ષમ છે. શિપિંગ લાઈનો પર દેખરેખ રાખવા અને ચાંચિયાગીરીના જોખમોને ઘટાડવામાં તે ભારતના દરિયાઈ દળોની ક્ષમતામાં વધારો કરે છે.

અદાણી ડિફેન્સે અગાઉ ચાલુ વર્ષે જૂનમાં ભારતીય સેનાને દૃષ્ટિ-10 સ્ટારલાઈનર ડ્રોન સોંપ્યું હતું. સેના તેને પંજાબ સ્થિત ભટિંડા બેઝ પર તૈનાત કરશે. તેનો ઉપયોગ પાકિસ્તાન સાથેની પશ્ચિમી સરહદ પર નજર રાખવા માટે કરી શકાય છે.

દૃષ્ટિ-10 સ્ટારલાઇનર નાટો ‘સ્ટેનાગ 4671’ પ્રમાણપત્ર પ્રાપ્ત એકમાત્ર માનવરહિત લશ્કરી પ્લેટફોર્મ છે. તે લશ્કરી UAV ને અન્ય નાટો સભ્યોની એરસ્પેસમાં કામ કરવાની મંજૂરી આપે છે. સંરક્ષણ તકનીકમાં આત્મનિર્ભરતા તરફની ભારતની સફરમાં આ એક નિર્ણાયક ક્ષણ છે. 

અદાણી ડિફેન્સ એન્ડ એરોસ્પેસ વૈશ્વિક બજારોમાં નિકાસ કરવા ભારતની પ્રથમ ખાનગી ક્ષેત્રની સૈન્ય UAV ઉત્પાદન કંપની છે. ભારતમાં પ્રથમ ખાનગી નાના શસ્ત્રો ઉત્પાદન અને પ્રથમ ખાનગી ક્ષેત્રની દારૂગોળો ઉત્પાદન કરતી કંપની સહિતની અનેક સિદ્ધિઓમાં હાંસલ કરવામાં અદાણી ડિફેન્સ અગ્રેસર છે.