અદાણી ગ્રુપ પર યુએસ જસ્ટિસ ડિપાર્ટમેન્ટના રિપોર્ટને લઈને વિપક્ષ સતત પાંચમા દિવસે સંસદમાં હંગામો મચાવી રહ્યો છે. તેવામાં અમેરિકાના રાષ્ટ્રપતિ જો બિડેને ખુદ આ જ અમેરિકી ન્યાય વિભાગની મજાક ઉડાવી હોવાનો કિસ્સો પ્રકાશમાં આવ્યો છે. બિડેને તેમના પુત્ર હન્ટર બિડેનની સજા માફ કરી દીધી છે. હન્ટર બિડેન ગેરકાયદેસર બંદૂક રાખવા અને કરચોરી માટે સજાનો સામનો કરી રહ્યો હતો. નિષ્ણાતોનું માનવું છે કે, હન્ટર બિડેન અને અદાણી કેસને બિનશરતી માફીને લઈને અમેરિકાની ન્યાયતંત્ર પર સવાલો ઉઠ્યા છે. તે રાજકીય હસ્તક્ષેપનું પરિણામ છે.

સોમવારે ન્યૂઝ એજન્સી ANIને બિઝનેસ કન્સલ્ટન્ટ સુહેલ સેઠે જણાવ્યું હતું કે, “જો બિડેને પોતે કહ્યું હતું કે અમેરિકન ન્યાય પ્રણાલી રાજનીતિથી સંક્રમિત છે. હવે આ સિસ્ટમ પર કોણ વિશ્વાસ કરશે?” શેઠે કહ્યું, “બિડેનનું નિવેદન સ્પષ્ટપણે દર્શાવે છે કે અમેરિકન ન્યાયતંત્રમાં રાજનીતિનો ઊંડો પ્રભાવ છે. જો રાષ્ટ્રપતિ બિડેન પોતે જ આ વ્યવસ્થા પર સવાલ ઉઠાવી રહ્યા છે, તો સામાન્ય નાગરિકોને કેવી રીતે વિશ્વાસ હશે?”

સુહેલ સેઠે જણાવ્યું હતું કે, “યુએસ જસ્ટિસ ડિપાર્ટમેન્ટ હવે સંપૂર્ણપણે રાજકીય પ્રભાવ હેઠળ કામ કરી રહ્યું છે. ખાસ કરીને ડોનાલ્ડ ટ્રમ્પના કેસમાં તેના યુ-ટર્ન બાદ તે પ્રકાશમાં આવી રહ્યું છે. ટ્રમ્પના કેસમાં જે થયું તે જોયું હવે તે કેસ પાછો ખેંચી લેવામાં આવ્યો છે.

સુહેલ સેઠે અદાણી ગ્રૂપના કેસની કાર્યવાહી પર સવાલો ઉઠાવતા કહ્યું હતું કે યુએસ પ્રોસિક્યુટરની ઉતાવળભરી કાર્યવાહી ભારતની તાજેતરની આર્થિક સફળતા સામે રાજકીય હેતુઓ દર્શાવે છે. શેઠે કહ્યું, “જો પ્રેસિડેન્ટ બિડેનને લાગે છે કે તેમના પુત્ર સામેનું વર્તન અયોગ્ય હતું, તો તેઓ અન્ય ભારતીય કંપનીઓ અને તેમની વિરુદ્ધ યુએસ ન્યાય પ્રણાલીના નિર્ણયો વિશે કેવી રીતે ન્યાયી ઠેરવી શકે? પછી તે અદાણી હોય કે અન્ય કોઈ બિઝનેસ ગ્રુપ…”

સુહેલ સેઠે અમેરિકન ન્યાય પ્રણાલીની વક્રોક્તિ પર ભાર મૂક્યો. તેમણે કહ્યું, “અમેરિકનોએ સમજવું જોઈએ કે તેઓ એવા પ્રજાસત્તાકમાં રહે છે જેનું સામ્રાજ્ય તૂટી રહ્યું છે.”

ઉલ્લેખનીય છે કે અમેરિકી રાષ્ટ્રપતિ જો બિડેને રવિવારે તેમના પુત્ર હન્ટર બિડેન માટે માફીપત્ર પર હસ્તાક્ષર કર્યા હતા. આ માફીનો અર્થ એ છે કે હન્ટર બિડેનને હવે સજા કરવામાં આવશે નહીં. ઉપરાંત તેના જેલ જવાની શક્યતા પણ ખતમ થઈ ગઈ છે. બિડેને તેમના પુત્ર સામેના આરોપોનો જવાબ એવી દલીલ કરીને આપ્યો કે સમાન કેસોમાં અન્ય લોકો સામાન્ય રીતે બિન-ગુનાહિત ઉકેલો મેળવે છે.

બિડેને એ પણ સ્પષ્ટ કર્યું કે તેઓ ન્યાય વિભાગના નિર્ણયોમાં દખલ કરશે નહીં, પરંતુ તેઓ માનતા હતા કે તેમના પુત્ર હન્ટર બિડેન પર પસંદગીયુક્ત અને અન્યાયી રીતે કાર્યવાહી કરવામાં આવી હતી. તેથી તેણે આગળ આવીને પોતાનો નિર્ણય લેવો પડ્યો.