અયોધ્યા ભગવાન રામના સ્વાગત માટે સંપૂર્ણ રીતે તૈયાર છે. રસ્તાઓ પર વિવિધ સ્થળોએ ટેબ્લોઝ છે. કલાકારો ડાન્સ કરી રહ્યા છે. રામલલ્લાની પ્રાણપ્રતિષ્ઠા પછી આ પહેલો દીપોત્સવ છે. આ કાર્યક્રમને ખાસ બનાવવા માટે CM યોગી પોતે અયોધ્યામાં રહેશે.

ભગવાનના સ્વાગત માટે દેશ-વિદેશના ભક્તો અયોધ્યા પહોંચ્યા છે. સમગ્ર વાતાવરણ રામમય થઈ ગયું છે. રામ મંદિરમાં એક ખાસ રંગોળી બનાવવામાં આવી હતી, જેમાં રંગોનો નહીં પણ ફૂલોનો ઉપયોગ કરવામાં આવ્યો હતો. દરવાજા પર તોરણ લગાવવામાં આવ્યા છે.

બીજી તરફ, એક સાથે 28 લાખ દીવા પ્રગટાવવાનો રેકોર્ડ બનાવવાની તૈયારીઓ પૂર્ણ કરી લેવામાં આવી છે. 55 ઘાટ પર દીવડા સજાવવામાં આવ્યા છે. તેલની વાટ લગાવવાનું કામ 30 ઓક્ટોબરની સાંજે પૂર્ણ થશે. આ પછી દીવા પ્રગટાવવામાં આવશે.

સીએમ યોગી 8મી વખત ભવ્ય કાર્યક્રમના સાક્ષી બનવા 30 ઓક્ટોબરે બપોરે 2.20 કલાકે રામકથા પાર્ક પહોંચશે.

હેલીપેડ સાઈટ પાસે સ્ટેજ પર ભરત મિલાપ થશે. રામલલા, લક્ષ્મણ, ભરત, શત્રુઘ્ન, હનુમાનજી અને વશિષ્ઠ મુનિની મૂર્તિઓ પર હેલિકોપ્ટરથી પુષ્પવર્ષા કરવામાં આવશે. બપોરે 2:50 કલાકે રામલલ્લા અને સીતાના સ્વરૂપો રથ પર બેસીને હેલિપેડ સાઈટ પરથી રામકથા પાર્ક સ્થિત મંચ પર બપોરે 3 કલાકે બિરાજમાન થશે.

દીપોત્સવનો મુખ્ય કાર્યક્રમ 30 ઓક્ટોબરે સવારે 9 કલાકે સાકેત મહાવિદ્યાલયથી નીકળેલી શોભાયાત્રા સાથે શરૂ થશે. રામકથા પાર્ક ખાતે બપોરે 3.15 થી 5.55 દરમિયાન વિવિધ કાર્યક્રમો યોજાશે. સીએમ યોગી સાંજે 5.55 કલાકે રામકથા પાર્કથી સરયુ આરતી માટે રવાના થશે.

સાંજે 6 થી 6.20 સુધી નયાઘાટ ખાતે સરયુ આરતીમાં હાજરી આપશે. સાંજે 6.25 કલાકે રામ કી પૌરી પર બનેલા મંચ પર પહોંચશે. સાંજે 6.25 થી 7.25 દરમિયાન અહીં દીપોત્સવના મુખ્ય કાર્યક્રમમાં ભાગ લેશે.