રાજ્ય સરકાર દ્વારા ઇન્ટર્ન્સ અને રેસિડન્ટ્સ તબીબોનાં હિતમાં મહત્ત્વપૂર્ણ નિર્ણય કરવામાં આવ્યો છે. તાજેતરમાં C.H.C, સબ-ડિસ્ટ્રિક્ટ, ડિસ્ટ્રિક્ટ હોસ્પિટલના કરાર આધારિત તજજ્ઞ તબીબોના પગારવધારાના મહત્ત્વપૂર્ણ નિર્ણય બાદ ઇન્ટર્ન્સ અને રેસિડન્ટ્સ તબીબોના સ્ટાઇપેન્ડમાં વધારો કરવાનો રાજ્ય સરકારે મહત્ત્વપૂર્ણ નિર્ણય કર્યો છે. આ વધારા મુજબ સરકારી મેડિકલ કૉલેજના મેડિકલ ઇન્ટર્ન્સને રૂ. 21,840, ડેન્ટલમાં રૂ. 20,160, ફિઝિયોથેરાપીમાં રૂ. 13,440 તેમજ આયુર્વેદ અને હોમિયોપેથીમાં રૂ.15,120 સ્ટાઇપેન્ડ મળશે. રાજ્ય સરકાર દ્વારા આ સ્ટાઇપેન્ડ વધારાનો હુકમ 01/04/2024ની અસરથી અમલમાં મૂકવામાં આવ્યો છે.

રાજ્યની સરકારી મેડિકલ, આયુર્વેદિક, હોમિયોપેથી, ડેન્ટલ અને ફિઝિયોથેરાપીની મેડિકલ કોલેજો અને જીએમઇઆરએસ હેઠળની મેડિકલ કોલેજો ખાતે અભ્યાસ કરતા ઇન્ટર્ન્સની સંખ્યા 4302 છે, જ્યારે રેસિડન્ટ ડોક્ટર્સની સંખ્યા 5332 છે. આ વિદ્યાર્થીઓના સ્ટાઈપેન્ડમાં વધારો કરતાં સરકારની તિજોરી પર રૂ. 122.83 કરોડનું વધારાનું ભારણ પડશે.

રાજ્યની 6 સરકારી અને 13 GMERS (ગુજરાત મેડિકલ એજ્યુકેશન એન્ડ રિસર્ચ સોસાયટી) સંચાલિત મેડિકલ કોલેજના સ્નાતક અભ્યાસક્રમના ઇન્ટર્ન્સ અને અનુસ્નાતક તેમજ સુપર સ્પેશિયાલિટી અભ્યાસક્રમના રેસિડન્ટ્સ તબીબોને મળતા સ્ટાઇપેન્ડના દરમાં વધારો કરવામાં આવ્યો છે. રાજ્યની સરકારી મેડિકલ કોલેજના મેડિકલ, ડેન્ટલ, ફિઝિયોથેરાપી, હોમિયોપેથી અને આયુર્વેદના સ્નાતક અભ્યાસક્રમના ઇન્ટર્ન્સ, અનુસ્નાતક અને સુપર સ્પેશિયાલિટી અભ્યાસક્રમના રેસિડન્ટ તબીબોને આ સ્ટાઇપેન્ડના દરમાં થયેલા વધારાનો લાભ મળશે.

ડિગ્રીના મેડિકલ રેસિડન્ટ્સને પ્રથમ વર્ષમાં રૂ. 1,00,800, બીજા વર્ષમાં રૂ. 1,02,480, ત્રીજા વર્ષમાં રૂ. 1,05,000, ચોથા વર્ષ (સિનિયર રેસિડન્ટ) અને ક્લિનિકલ આસિસટન્ટને રૂ. 1,10,880નો લાભ મળશે.

સુપર સ્પેશિયાલિસ્ટ સેવાઓના મેડિકલ રેસિડન્ટ્સને પ્રથમ વર્ષમાં રૂ.1,20,960, બીજા વર્ષમાં રૂ.1,26,000 અને ત્રીજા વર્ષમાં રૂ.1,34,400 તેમજ ડેન્ટલ રેસિડન્ટ(ડિગ્રી)માં પ્રથમ વર્ષમાં રૂ.78,960, બીજા વર્ષમાં રૂ.81,480, ત્રીજા વર્ષમાં રૂ.83,496, ફિઝિયોથેરાપી (ડિગ્રી)માં પ્રથમ વર્ષમાં રૂ.35,280 અને બીજા વર્ષમાં રૂ.43,680 ચૂકવવામાં આવશે.

મેડિકલ રેસિડન્ટ(ડિપ્લોમાં)ને પ્રથમ વર્ષમાં રૂ.75,600 અને બીજા વર્ષમાં રૂ.82,320 સ્ટાઇપેન્ડ ચૂકવાશે. આયુર્વેદિક સેવાઓમાં પી.જી. રેસિડન્ટ્સને પ્રથમ વર્ષમાં રૂ.50,400, બીજા વર્ષમાં રૂ.53,760 અને ત્રીજા વર્ષમાં રૂ. 57,120 ચૂકવવામાં આવશે. ઉપરાંત GMERS સંચાલિત મેડિકલ કોલેજના સ્નાતક અભ્યાસક્રમના ઇન્ટર્ન્સને રૂ. 21,840, જુનિયર રેસિડન્ટ્સને રૂ.1,00,800 અને સિનિયર રેસિડન્ટ્સને રૂ. 1,10,880 ચૂકવવામાં આવશે.

GMERS સંચાલિત મેડિકલ કોલેજના અનુસ્નાતક અભ્યાસક્રમના જુનિયર અને સિનિયર રેસિડન્ટ તબીબોને પ્રથમ વર્ષમાં રૂ. 1,00,800, બીજા વર્ષમાં રૂ. 1,02,480, ત્રીજા વર્ષમાં રૂ. 1,05,000 ચોથા વર્ષમાં (સિનિયર રેસીડન્ટ અને ક્લિનિકલ આસિસટન્ટ)ને રૂ. 1,10,880 સ્ટાઇપેન્ડ ચૂકવવામાં આવશે.

ત્રણ દિવસ પહેલાં જ રાજ્ય સરકાર દ્વારા ગ્રામ્ય આરોગ્ય સેવાઓને વધુ સુદૃઢ બનાવવા CHC, સબ-ડિસ્ટ્રિક્ટ અને ડિસ્ટ્રિક્ટ હોસ્પિટલ ખાતે સેવારત કોન્ટ્રેક્ટ આધારિત નિષ્ણાત તબીબો માટે એક મહત્ત્વપૂર્ણ નિર્ણય કરવામાં આવ્યો હતો. એની સાથે સાથે રાજ્યના કોન્ટ્રેક્ટ આધારિત તબીબોને ખાનગી પ્રેક્ટિસની છૂટ બંધ કરવાનો નિર્ણય કરાયો હતો. વધુ ખાનગી પ્રેક્ટિસ વગર કરાર આધારિત સેવા આપતા તજજ્ઞ તબીબોના પ્રતિ માસના વેતનમાં માતબર રકમનો વધારો કરાયો છે.

રાજ્યના કરાર આધારિત તજજ્ઞોને ખાનગી પ્રેક્ટિસ વગર હાલ જે રૂ. 95,000 પ્રતિ માસ વેતન આપવામાં આવે છે એ વધારીને હવેથી પ્રતિ માસ રૂ. 1,30,000 આપવાનું સરકારી ઠરાવ દ્વારા નક્કી કરવામાં આવ્યું છે, એટલે કે અંદાજિત 37 % જેટલો વધારો કરવામાં આવ્યો છે. વધુમાં સર્જરી સાથે સંકળાયેલા તજજ્ઞ તબીબોને પ્રતિ માસ મળતાં વેતન ઉપરાંત મેજર અને માઇનોર સર્જરી માટે રૂ.300થી રૂ. 2000 સુધીની પ્રોત્સાહક રકમ પ્રતિ સર્જરી આપવામાં આવશે.

વધુમાં કરાર આધારિત સેવારત એનેસ્થેટિસ્ટ તબીબોને પ્રોત્સાહક રકમના 50 ટકા રકમ પ્રતિ સર્જરી આપવાનું પણ નક્કી કરવામાં આવ્યું છે. સર્જિકલ તજજ્ઞો સિવાયના અન્ય તજજ્ઞોને PMJAYનાં પ્રવર્તમાન ધારા-ધોરણો મુજબ જ ઇન્સેન્ટિવ મળવાપાત્ર બનશે. રાજ્ય સરકારના ઠરાવ પ્રમાણે જનરલ સર્જરી, ઓર્થોપેડિક્સ, ગાયનેકોલોજિસ્ટ અને ઇ.એન.ટી.ને લગતી વિવિધ મેજર સર્જરી માટે રૂ. 2000 અને રૂ.1250 તેમજ માઇનોર સર્જરી માટે રૂ. 600 અને રૂ. 300 પ્રતિ સર્જરી તબીબોને ચૂકવવામાં આવશે.

અત્રે ઉલ્લેખનીય છે કે રાજ્યમાં સામૂહિક આરોગ્ય કેન્દ્ર, સબ-ડિસ્ટ્રિક્ટ હોસ્પિટલ ડિસ્ટ્રિક્ટ હોસ્પિટલ ખાતે તજજ્ઞ તબીબોની સેવા વધુ સુદૃઢ બને એ માટે આ હિતકારી નિર્ણય લેવમાં આવ્યો છે, જે તજજ્ઞ તબીબોને સરકારી સેવાઓ સાથે જોડાવવા માટે પ્રોત્સાહન પૂરું પાડશે.