હવામાન વિભાગ દ્વારા આજથી 21 જુલાઈ સુધી રાજ્યમાં સાર્વત્રિક વરસાદની આગાહી કરવામાં આવી છે. જેમાં આજે અને આવતીકાલે વિવિધ જિલ્લાઓમાં અતિ ભારે વરસાદ વરસી શકે છે. જેમાં ખાસ કરીને દક્ષિણ ગુજરાતના ભાગોમાં અત્યંત ભારે વરસાદની સાથે રેડ એલર્ટ જાહેર કરવામાં આવ્યું છે. જ્યારે સૌરાષ્ટ્ર સહિતના વિસ્તારોમાં અતિ ભારે વરસાદ સાથે આગાહી કરવામાં આવી છે. બાકીના તમામ જિલ્લાઓમાં ભારે વરસાદની સાથે યલો એલર્ટ જાહેર કરવામાં આવ્યું છે. દક્ષિણ ગુજરાતના ભાગોમાં અત્યંત ભારે વરસાદની સાથે ભારે પવન ફૂંકાવાની શક્યતાઓને પગલે બે દિવસ માટે માછીમારોને દરિયો ન ખેડવા સૂચના આપવામાં આવી છે.

રેડ એલર્ટ

સુરત, નર્મદા, છોટાઉદેપુર, ભરૂચ, નવસારી, વલસાડ, દમણ, દાદરા અને નગર હવેલી

ઓરેન્જ એલર્ટ

અમદાવાદ, સુરેન્દ્રનગર, બોટાદ, ભાવનગર, અમરેલી, સાબરકાંઠા, અરવલ્લી, મહીસાગર, આણંદ, વડોદરા, પંચમહાલ, દાહોદ, તાપી, ડાંગ

હવામાન વિભાગના ડાયરેક્ટર એ.કે. દાસના જણાવ્યા અનુસાર હાલમાં ગુજરાત રાજ્ય પર સાઈક્લોનિક સર્ક્યુલેશન ઓફ શોર ટ્રફ અને વેસ્ટર્ન ડિસ્ટન્સ સક્રિય થયું હોવાથી સાર્વત્રિક વરસાદની શક્યતા છે. મહત્વનું છે કે, હવામાન નિષ્ણાંત અંબાલાલ પટેલ તથા પરેશ ગોસ્વામી દ્વારા ગુજરાત રાજ્યમાં 14થી 25 જુલાઈ દરમિયાન વિવિધ ભાગોમાં ભારેથી ભારે વરસાદની આગાહી વ્યક્ત કરવામાં આવી હતી. જે બાદ આજે અમદાવાદ શહેરમાં બપોરે એકાએક વાતાવરણમાં પલટો આવ્યા બાદ ધોધમાર વરસાદ વરસ્યો હતો. આ સાથે જ દક્ષિણ ગુજરાતના જિલ્લાઓમાં તથા વડોદરા, પંચમહાલ સહિતના જિલ્લાઓમાં મેઘરાજા ધબધબાટી બોલાવી રહ્યા છે.