ICC મેન્સ ટી20 વર્લ્ડ કપ 2024ની 29મી મેચમાં અફઘાનિસ્તાને પાપુઆ ન્યુ ગિની (PNG)ને સાત વિકેટે હરાવ્યું છે. 14મી જૂનના રોજ રમાયેલી આ મેચ ત્રિનિદાદના બ્રાયન લારા સ્ટેડિયમમાં રમાઈ હતી. અફઘાનિસ્તાનના કેપ્ટન રાશિદ ખાને ટોસ જીતીને પ્રથમ બોલિંગ કરવાનો નિર્ણય કર્યો હતો. આ મેચમાં PNGએ અફઘાનિસ્તાનને જીતવા માટે 96 રનનો ટાર્ગેટ આપ્યો હતો, જે તેણે 29 બોલ બાકી રહેતાં હાંસલ કરી લીધો હતો.

પાપુઆ ન્યુ ગિનીની ટીમ 19.5 ઓવરમાં 95 રનમાં સમેટાઈ ગઈ હતી. જવાબમાં અફઘાનિસ્તાને 15.1 ઓવરમાં ત્રણ વિકેટ ગુમાવીને લક્ષ્યાંક હાંસલ કરી લીધો હતો.

આ જીત સાથે ન્યુઝીલેન્ડનું સપનું ચકનાચૂર થઈ ગયું છે. અફઘાનિસ્તાનની જીત સાથે ન્યૂઝીલેન્ડની ટીમ વર્લ્ડકપમાંથી બહાર થઇ ગઇ છે.

અફઘાનિસ્તાનની ટીમ ગ્રુપ સીમાંથી સુપર-8માં પહોંચનારી બીજી ટીમ બની છે. વેસ્ટ ઈન્ડિઝની ટીમ આ ગ્રુપમાંથી ક્વોલિફાઈ થઈ ચૂકી છે. આ સિવાય ભારત, ઓસ્ટ્રેલિયા અને સાઉથ આફ્રિકા પણ પ્લેઓફમાં પહોંચી ગયા છે. એટલે કે, અત્યાર સુધીમાં પાંચ ટીમ સુપર 8માં પહોંચી ગઈ છે અને માત્ર ત્રણ જ સ્થાન બાકી છે.

આ મેચમાં અફઘાનિસ્તાન તરફથી ગુલબદ્દીન નાયબે 36 બોલમાં અણનમ 49 રન બનાવ્યા જેમાં ચાર ચોગ્ગા અને બે છગ્ગાનો સમાવેશ થાય છે. જ્યારે મોહમ્મદ નબી 16 રન બનાવી નોટઆઉટ રહ્યો હતો. વિકેટકીપર બેટ્સમેન રહેમાનુલ્લાહે 11 રન અને અઝમતુલ્લા ઓમરઝાઈએ 13 રનનું યોગદાન આપ્યું હતું. પાપુઆ ન્યુ ગિની તરફથી એલી નાઓ, સેમો કામિયા અને નોર્મન વાનુઆએ એક-એક વિકેટ લીધી હતી.

ટોસ હારીને પ્રથમ બેટિંગ કરવા આવેલા PNGના ચાર બેટ્સમેન રન આઉટ થયા બાદ પપુઆ ન્યૂ ગિનીની આખી ટીમ 20 ઓવર પણ રમી શકી નહોતી. PNGએ 19.5 ઓવરમાં 95 રન બનાવ્યા હતા. વિકેટકીપર બેટ્સમેન કિપ્લિન ડોરિગાએ સૌથી વધુ 27 રન બનાવ્યા હતા. આ સિવાય માત્ર એલી નાઉ અને ટીનો ઉરા ડબલ ડિજિટ સુધી પહોંચી શક્યા.

અફઘાનિસ્તાન તરફથી ફઝલહક ફારૂકીએ સૌથી વધુ ત્રણ વિકેટ લીધી હતી. નવીન ઉલ હકને બે અને નૂર અહેમદને એક વિકેટ મળી હતી. પીએનજીના ચાર બેટ્સમેન રન આઉટ થયા હતા.