– ૧૪ વર્ષની દીકરીના અંડાશયમાંથી ૪.૫ કિ.ગ્રા. પાણી અને કચરો ભરેલી ૨૧.૧૪ સે.મી.સાઈઝની ગાંઠ કાઢી ફૂલેલું પેટ પૂર્વવત કરાયું

જી.કે. જનરલ અદાણી હોસ્પિટલમાં ૧૪ વર્ષની કિશોરીના અંડાશયમાં છેલ્લા પાંચ વર્ષથી વિકસિત ૪.૫ કિલોગ્રામ વજનની પાણીથી ભરેલી ગાંઠ, સ્ત્રી રોગ વિભાગના તબીબોએ અઢી કલાકની જહેમત પછી છેક લીવર સુધી ફૂલી ગયેલા પેટનું દૂરબીનથી ઓપરેશન કરી મૂળ સ્થિતિમાં લાવી દીધું હતું.

જી.કે.ના સ્ત્રીરોગ વિભાગના ડો. વિનોદ મકવાણાએ આ સફળ ઓપરેશન કર્યા બાદ જણાવ્યું હતું કે, માધાપરની ૧૪ વર્ષની દેવ્યાંગીની વસંતભાઈ ગોસાઈ અત્રે સારવાર માટે આવી ત્યારે તેનું પેટ ખૂબ જ ફૂલેલું હતું અને પેટમાં દુખાવો હતો.તબીબોની ટીમે એમ.આર.આઇ. કરાવતા          

દીકરીના પેટમાં વિકસિત ગાંઠ અંડાશયની (બીનાઈન મ્યુસીનસ સિસ્ટ ઓફ ઓવરી) જણાઇ હતી. તબીબોને શંકા જતા કેન્સરના પરિક્ષણ માટે ગાંઠના ટયુમર માર્કર લઈ મોકલ્યા જે નેગેટિવ આવતા તબીબો અને કુટુંબીજનોએ રાહતનો શ્વાસ લીધો અને પેટમાં દૂરબીનથી શસ્ત્રક્રિયા કરવાનો નિર્ણય કર્યો. સતત અઢી કલાક ઓપરેશન કરી સાડા ચાર કિલો ગાંઠના રૂપમાં રહેલું પાણી કાઢ્યું. ત્યારબાદ અંડાશયની ગાંઠમાંથી પાણી કાઢ્યા બાદ નકામો કચરો પણ દૂર કરી, અંડાશયને મૂળ સ્વરુપમાં લાવવામાં સફળતા મળી.

સાડા ચાર કિલોની આ ગાંઠની સાઈઝ ૨૧.૧૪ સે.મી.હતી.આ ઓપરેશનમાં ડો.કવલ શાહ, ડો.પ્રેક્ષા શાહ, ડો. શાહિલ પટેલ, ડો. કનિકા અશર, ડો.ઉર્વશી ચૌધરી, તેમજ એનેસ્થેટીક તબીબો ડો. જલદીપ પટેલ અને ડો.ધ્રુવ તથા ડો.ચિરાગ જોડાયા હતા.