રાઉઝ એવન્યુ કોર્ટે લિકર પોલિસી કેસમાં દિલ્હીના સીએમ અરવિંદ કેજરીવાલની ED કસ્ટડી વધુ 4 દિવસ લંબાવી છે. આ પહેલાં કોર્ટમાં 39 મિનિટ સુધી સુનાવણી ચાલી હતી. કેજરીવાલે પોતે આ કેસની દલીલ કરી હતી. આમ કરનાર તેઓ દેશના પહેલા સિટિંગ સીએમ બન્યા છે.

EDએ કોર્ટ પાસે કેજરીવાલની વધુ 7 દિવસની કસ્ટડી માગી હતી. દલીલો સાંભળ્યા બાદ રાઉઝ એવન્યુ કોર્ટે નિર્ણય સુરક્ષિત રાખ્યો છે. કોર્ટમાં સુનાવણી બપોરે 1.59 વાગ્યે શરૂ થઈ અને 2.39 વાગ્યે સમાપ્ત થઈ.

આ તરફ, જ્યારે કોર્ટમાં હાજર થવા જઈ રહ્યા હતા, ત્યારે તેમને પૂછવામાં આવ્યું હતું કે એલજીએ કહ્યું હતું કે જેલમાંથી સરકાર નહીં ચાલે. તેના જવાબમાં કેજરીવાલે કહ્યું કે આ એક રાજકીય ષડ્યંત્ર છે, જનતા તેનો જવાબ આપશે.

દારૂ નીતિ કેસમાં ધરપકડ કરાયેલા અરવિંદ કેજરીવાલને મુખ્યમંત્રી પદેથી હટાવવાની અરજી પર દિલ્હી હાઈકોર્ટમાં સુનાવણી કરવામાં આવી હતી. દિલ્હી હાઈકોર્ટના કાર્યકારી મુખ્ય ન્યાયાધીશ (ACJ) એ મામલે દખલગીરી કરવાનો ઇનકાર કર્યો છે.

ACJ મનમોહને કહ્યું, “આ અરજી પર અમારે સુનાવણી ન કરવી જોઈએ. આ મામલે ન્યાયતંત્રે દખલગીરી કરવી જોઈએ નહીં.” દિલ્હી હાઈકોર્ટનું કહેવું છે કે આ એક રાજકીય મામલો છે, જે ન્યાયતંત્રના દાયરામાં નથી આવતો.

કેજરીવાલની 21 માર્ચે ED દ્વારા ધરપકડ કરવામાં આવી હતી. 22 માર્ચે તેને ટ્રાયલ કોર્ટમાં હાજર કરવામાં આવ્યા હતા. કોર્ટે કેજરીવાલને 28 માર્ચ સુધી EDની કસ્ટડીમાં મોકલી દીધા હતા.

અરજી પર દિલ્હી હાઈકોર્ટની 6 ટિપ્પણીઓ

1. તમે જે કહો છો તેના માટે કોઈ કાયદો કે નિયમ છે? ચાલો અમને જણાવો. શું એવા કોઈ નિયંત્રણો છે કે જેના વિશે તમે અમને કહી શકો. કેજરીવાલ મુખ્યમંત્રી પદ પર ન રહી શકે એવી કોઈ બાબત.

2. તમારે અમને જણાવવું પડશે કે શું એવો કોઈ નિયમ, કોઈ પ્રતિબંધ છે, જે કેજરીવાલને મુખ્યમંત્રી પદે રહેતા અટકાવે છે. જો આ મામલે કોઈ બંધારણીય જોગવાઈ હશે તો રાષ્ટ્રપતિ અથવા LG તેના પર કાર્યવાહી કરશે.

3. શું આ બાબતમાં કોઈ પણ પ્રકારની ન્યાયિક દખલ જરૂરી છે? આપણે આજનું અખબાર વાંચીએ છીએ. LG આ મામલાને જોઈ રહ્યા છે. આ પછી મામલો રાષ્ટ્રપતિ પાસે જશે.

4. અમે જાણીએ છીએ કે કેટલીક વ્યવહારિક મુશ્કેલીઓ હોઈ શકે છે. શા માટે આપણે આ અંગે કોઈ આદેશ જારી કરવો જોઈએ? અમારે રાષ્ટ્રપતિ કે એલજીને કોઈ સૂચના આપવાની જરૂર નથી. વહીવટી તંત્ર રાષ્ટ્રપતિ શાસન લાગુ કરી શકે છે. તેમને સૂચનાઓ આપવાનું અમારું કામ નથી. આપણે આમાં કેવી રીતે દખલ કરી શકીએ? અમને વિશ્વાસ છે કે વહીવટી તંત્ર આ સમગ્ર મામલાની તપાસ કરી રહ્યું છે. તેમાં થોડો સમય લાગી શકે છે, પરંતુ તેઓ ચોક્કસપણે નિર્ણય લેશે.

5. આપણે રાજકારણ ન કરવું જોઈએ. રાજકીય પક્ષો આ જોશે. તે જનતા વચ્ચે થશે. આ આપણું કામ નથી. આમાં ન્યાયિક દખલની કોઈ જરૂર નથી.

6. અરજદારનું કહેવું છે કે જો કેજરીવાલ મુખ્યમંત્રી રહેશે તો દિલ્હી સરકારની વિશ્વસનીયતા અને છબી કલંકિત થશે.

કેજરીવાલ જેલમાંથી સરકાર ચલાવી રહ્યા છે, બે આદેશ જારી કર્યા

કેજરીવાલ ધરપકડ કરાયેલા પ્રથમ સિટિંગ સીએમ છે. આ પહેલાં ઝારખંડના પૂર્વ સીએમ હેમંત સોરેનની ED દ્વારા ધરપકડ કરવામાં આવી હતી. સોરેન રાજભવન ગયા હતા અને ED કસ્ટડીમાંથી રાજીનામું આપ્યું હતું. ધરપકડ બાદ કેજરીવાલ જેલમાંથી જ સરકાર ચલાવી રહ્યા છે. તેણે જેલમાંથી બે ઓર્ડર જારી કર્યા છે. કેજરીવાલે 24 માર્ચે જળ મંત્રાલયના નામે પહેલો સરકારી આદેશ જારી કર્યો હતો. તેમણે જળ મંત્રી આતિશીને દિલ્હીમાં જ્યાં પાણીની તંગી છે ત્યાં ટેન્કરની વ્યવસ્થા કરવા સૂચના આપી હતી. કોર્ટમાં તેમની હાજરી સમયે, તેમણે કહ્યું હતું કે તેઓ રાજીનામું આપશે નહીં અને જો જરૂર પડશે તો જેલમાંથી સરકાર ચલાવશે.

આ પછી કેજરીવાલે 26 માર્ચે વધુ એક સરકારી આદેશ જારી કર્યો. તેમણે આરોગ્ય મંત્રાલયને સૂચના આપી કે મોહલ્લા ક્લિનિક્સમાં ગરીબો માટે દવાઓની કોઈ અછત ન હોવી જોઈએ. લોકોને મફત તપાસ અને દવાઓ પૂરી પાડવી જોઈએ.

કેજરીવાલે સરકારી આદેશો આપ્યાના કેસની ED તપાસ કરી રહી છે

કેજરીવાલ કસ્ટડીમાંથી કેવી રીતે સરકારી આદેશો આપી રહ્યા છે તેની ED તપાસ કરી રહી છે. EDનાં સૂત્રોનું કહેવું છે કે તેમની પાસેથી ન તો કોઈ કાગળ કે ન તો કોઈ ઈલેક્ટ્રોનિક સાઘનો જેમ કે કોમ્પ્યુટર કે ફોન મળી આવ્યો, તો પછી તેઓએ કોઈ ઓર્ડર કેવી રીતે પાસ કર્યો? આ તપાસનો વિષય છે. EDના વરિષ્ઠ અધિકારીઓની ટીમ ટૂંક સમયમાં રિપોર્ટ તૈયાર કરશે.