બજેટની રજૂઆતના એક દિવસ પહેલા કેન્દ્ર સરકારે મોબાઈલ સ્પેરપાર્ટ્સ પરની ઈમ્પોર્ટ ડ્યુટી 15%થી ઘટાડીને 10% કરી દીધી છે. તેનાથી મોબાઈલ ફોન સસ્તા થઈ શકે છે.

નાણા મંત્રાલય દ્વારા જારી કરાયેલા નોટિફિકેશન મુજબ બેટરી કવર, મેઈન કેમેરા લેન્સ, બેક કવર, પ્લાસ્ટિક અને મેટલની અન્ય મિકેનિકલ વસ્તુઓ, GSM એન્ટેના અને અન્ય પાર્ટ્સ પરની આયાત ડ્યૂટી ઘટાડીને 10% કરી દેવામાં આવી છે.

તાજેતરમાં જ મોબાઈલ કંપનીઓએ ઉત્પાદન ખર્ચ ઘટાડવા માટે સરકાર પાસે 12 સ્પેરપાર્ટ્સ પર ઈમ્પોર્ટ ડ્યૂટી ઘટાડવાની માંગ કરી હતી. કંપનીઓએ કહ્યું કે જો ચીન અને વિયેતનામ જેવા દેશોએ મેન્યુફેક્ચરિંગમાં સ્પર્ધા કરવી હશે તો ખર્ચ ઘટાડવો પડશે.

ચીન, વિયેતનામ જેવા દેશો કરતાં ભારતમાં વધુ ટેક્સ
ઈન્ડિયા સેલ્યુલર એન્ડ ઈલેક્ટ્રોનિક્સ એસોસિએશન (આઈસીઈએ) અનુસાર, મોબાઈલ ફોનના આવશ્યક ઘટકો જેમ કે કેમેરા મોડ્યુલ અને ચાર્જર પર આયાત ડ્યૂટી 2.5%થી 20% સુધીની છે.

આ ટેક્સ ચીન અને વિયેતનામ જેવા અગ્રણી મોબાઈલ મેન્યુફેક્ચરિંગ દેશો કરતા ઘણો વધારે છે. ICEAએ કહ્યું કે જ્યાં સુધી આ ટેક્સ ઘટાડવામાં નહીં આવે ત્યાં સુધી ભારતની મોબાઈલ નિકાસ વૃદ્ધિ ધીમી રહી શકે છે.

સ્માર્ટ ફોનના ભાવ ઘટશે
ગ્લોબલ ટ્રેડ રિસર્ચ ઇનિશિયેટિવના રિપોર્ટ અનુસાર ભારતમાં વેચાતા 98% સ્માર્ટફોન દેશમાં જ બને છે. મેન્યુફેક્ચરિંગ પાર્ટ્સ પરની આયાત ડ્યૂટીમાં ઘટાડાથી મોબાઈલ ફોન સેક્ટરને ફાયદો થશે.આનાથી ભારતમાં મોબાઈલની કિંમતમાં ઘટાડો થવાની ધારણા છે.

ડ્યુટી ઘટાડવાથી નિકાસ વધશે
ટેક્સ કન્સલ્ટન્સી ફર્મ મૂર સિંઘીના ડિરેક્ટર રજત મોહને જણાવ્યું હતું કે, મોબાઇલ ફોનના પાર્ટ્સની આયાત પરની ડ્યૂટી કાપથી મોટા વૈશ્વિક ઉત્પાદકોને ભારતમાં મોટા પાયે મોબાઇલ એસેમ્બલી લાઇન સ્થાપિત કરવામાં મદદ મળશે. તેનાથી મોબાઈલ ફોનની નિકાસ વધશે.

ભારતની મોબાઈલ નિકાસ બમણી થઈ
2022માં ભારતીય સ્માર્ટફોનની નિકાસ $7.2 બિલિયન (લગભગ 60 હજાર કરોડ રૂપિયા) હતી, જે 2023માં વધીને $13.9 બિલિયન (રૂ. 1.1 લાખ કરોડ) થઈ જશે. 2024માં સ્માર્ટફોનની નિકાસ $15 બિલિયન (આશરે રૂ. 1.2 લાખ કરોડ)થી વધુ થવાની ધારણા છે.