~ ઓસ્ટ્રેલિયા બીજી ઈનિંગમાં 91 રનમાં જ ઓલઆઉટ

~ ભારતે સીરીઝની પહેલી મેચ 3 દિવસમાં જીતી લીધી

ભારતીય ટીમ અને ઓસ્ટ્રેલિયા વચ્ચે 4 મેચની બોર્ડર-ગાવસ્કર શ્રેણીની પ્રથમ ટેસ્ટ નાગપુરમાં રમાઈ હતી. આજે મેચનો ત્રીજો દિવસ હતો. ભારતે બોર્ડર-ગાવસ્કર ટ્રોફીની પ્રથમ ટેસ્ટ મેચ એક ઇનિંગ અને 132 રને જીતી લીધી છે. ટીમ ઈન્ડિયાએ ટેસ્ટ રેન્કિંગમાં નંબર-1 ઓસ્ટ્રેલિયાને ખરાબ રીતે હરાવ્યુ હતું. ઓસ્ટ્રેલિયાની ટીમ બીજી ઈનિંગમાં 91 રનમાં જ ઓલઆઉટ થઈ હતી. ઓસ્ટ્રેલિયાની બીજી ઈનિંગમાં રવિચંદ્રન અશ્વિને 5 વિકેટ લીધી. ભારતે સીરીઝની પહેલી મેચ 3 દિવસમાં જીતી લીધી હતી.

રવિન્દ્ર જાડેજા પ્લેયર ઓફ ધ મેચ બન્યો

આ પહેલા મેચમાં ટોસ જીતીને પ્રથમ બેટિંગ કરવા ઉતરેલી ઓસ્ટ્રેલિયન ટીમ પ્રથમ ઈનિંગમાં 177 રનમાં ઓલઆઉટ થઈ હતી. ઓસ્ટ્રેલિયાની પહેલી ઈનિંગમાં ભારતના સ્પિનર રવિન્દ્ર જાડેજાએ 5 વિકેટ ઝડપી હતી. ઓસ્ટ્રેલિયાની પહેલી ઈનિંગના જવાબમાં ભારતે પહેલી ઈનિંગમાં 400 રન બનાવ્યા હતા. ભારત તરફથી કેપ્ટન રોહિત શર્માએ શાનદાર સદી ફટકારી હતી. ભારતની પહેલી ઈનિંગમાં ઓસ્ટ્રેલિયાના સ્પિનર ટોડ મર્ફીએ તેના પહેલી જ મેચમાં 7 વિકેટ ઝડપી હતી. ભારતે ઓસ્ટ્રેલિયા પર 223 રનની લીડ બનાવી હતી જેના જવાબમાં ઓસ્ટ્રેલિયાની ટીમ 91 રનમાં જ ઓલઆઉટ થઈ હતી.

મેચમાં ભારત અને ઓસ્ટ્રેલિયાની પ્લેઈંગ ઈલેવન

ભારતીય ટીમ

રોહિત શર્મા (કેપ્ટન), કેએલ રાહુલ, ચેતેશ્વર પુજારા, વિરાટ કોહલી, સૂર્યકુમાર યાદવ, શ્રીકર ભરત (વિકેટકીપર), રવિન્દ્ર જાડેજા, રવિચંદ્રન અશ્વિન, અક્ષર પટેલ, મોહમ્મદ શમી અને મોહમ્મદ સિરાજ.

ઓસ્ટ્રેલિયાની ટીમ

ડેવિડ વોર્નર, ઉસ્માન ખ્વાજા, માર્નસ લાબુશેન, સ્ટીવ સ્મિથ, મેટ રેનશો, પીટર હેન્ડ્સકોમ્બ, એલેક્સ કેરી (wk), પેટ કમિન્સ, નાથન લિયોન, ટોડ મર્ફી, સ્કોટ બોલેન્ડ

ટેસ્ટ ચેમ્પિયનશિપ માટે આ શ્રેણી મહત્વપૂર્ણ 

બોર્ડર-ગાવસ્કર ટ્રોફીમાં ભારતીય ટીમની નજર ટેસ્ટ ચેમ્પિયનશિપની ફાઈનલ પર ટકેલી છે. આ શ્રેણી બાદ ટેસ્ટ ચેમ્પિયનશિપની ફાઈનલ 7 થી 11 જૂન દરમિયાન લંડનમાં યોજાવાની છે. ટેસ્ટ ચેમ્પિયનશિપ પોઈન્ટ ટેબલની ટોપ-2 ટીમો વચ્ચે આ ફાઈનલ મેચ રમાશે. ઓસ્ટ્રેલિયન ટીમે નંબર-1 પર રહીને પોતાનું સ્થાન લગભગ નિશ્ચિત કરી લીધું છે.