~ ટોક્યોમાં જુલાઈમાં આબેની અંતિમક્રિયા કરાઈ હતી

~ વિવાદો વચ્ચે રૂ. ૯૭ કરોડના ખર્ચે શિન્જો આબેના સૌથી મોંઘા રાજકીય અંતિમ સંસ્કાર સંપન્ન થયા

જાપાનમાં વિવાદો વચ્ચે મંગળવારે ભૂતપૂર્વ વડાપ્રધાન શિન્જો આબેના રાજકીય અંતિમ સંસ્કાર સંપન્ન થયા હતા. પીએમ નરેન્દ્ર મોદીએ ભારત અને જાપાનના સંબંધોમાં શિન્જો આબેના યોગદાનની પ્રશંસા કરી હતી તથા અકાસા પેલેસમાં આબેના પત્નીને મળી તેમને સાંત્વના પાઠવી હતી. આ સાથે પીએમ મોદીએ જાપાનના વડાપ્રધાન ફુમિયો કિશિદા સાથે બેઠક કરી હતી.

જાપાનના વડાપ્રધાન ફુમિયો કિશિદાએ દેશ માટે સૌથી લાંબા સમય સુધી સેવા આપનારા નેતા શિન્જો આબેના અંતિમ સંસ્કારનો ખર્ચ સરકારી ભંડોળ દ્વારા ઉઠાવવાને સન્માનની બાબત ગણાવી હતી. જોકે, આ મુદ્દે જાપાનમાં વિપક્ષ અને જનતાનો મત વિભાજિત છે. અનેક જગ્યાએ તેનો વિરોધ પણ થયો હતો. શિન્જો આબેના રાજકીય અંતિમ કાર્યક્રમ પાછળ અંદાજે રૂ. ૯૭ કરોડનો ખર્ચ થયો હોવાનું મનાય છે, જે દુનિયામાં સૌથી મોંઘા રાજકીય સન્માન હશે. 

બીજીબાજુ ટોક્યોના નિપ્પોન બુડોકનમાં આયોજિત રાજકિય અંતિમ સંસ્કારમાં ભારતના વડાપ્રધાન નરેન્દ્ર મોદી, અમેરિકાના ઉપપ્રમુખ કમલા હેરિસ, જાપાનના યુવરાજ અકિશિનો સહિત ૧૦૦થી વધુ દેશોના પ્રતિનિધિઓ હાજર રહ્યા હતા, જેમાં ૨૦થી વધુ રાષ્ટ્રાધ્યક્ષ અને સરકારના પ્રમુખ હતા. પીએમ મોદીએ શ્રીમતિ આબે પ્રત્યે સંવેદના વ્યક્ત કરી હતી અને ભારત-જાપાનના સંબંધોને નવી ઊંચાઈઓ પર લઈ જવામાં પૂર્વ પીએમ આબેના મહત્વપૂર્ણ યોગદાન તથા તેમની સાથે પોતાની મિત્રતાને યાદ કરી હતી.

આબેનાં પત્ની અકી કાળા રંગનો ‘કિમોનો’ પહેરી નિપ્પોન બુડોકન હોલમાં શિન્જો આબેનાં અસ્થિ કળશ સાથે પહોંચ્યાં હતા. જાપાનના વડાપ્રધાન કિશિદાએ ૧૨ મિનિટના શોક સંદેશમાં આબેના નેતૃત્વ, યુદ્ધ પછીના આર્થિક વિકાસ અને જાપાન અને દુનિયાના વિકાસ માટે સ્પષ્ટ દૃષ્ટિકોણ અને ચીનના ઉદયનો સામનો કરવા માટે ‘મુક્ત અને ખુલ્લા હિન્દ-પ્રશાંત ક્ષેત્ર’ની માન્યતાને પ્રોત્સાહન આપવા માટે આબેની પ્રશંસા કરી હતી. આ કાર્યક્રમમાં ૭૦૦થી વધુ વિદેશી અતિથિઓ સહિત ૪,૩૦૦થી વધુ લોકો હાજર રહ્યા હતા.

શિન્જો આબેને પુષ્પાંજલી અર્પણ કર્યા પછી વડાપ્રધાન નરેન્દ્ર મોદીએ જાપાનના પીએમ ફુમિયો કિશિદા સાથે એક  બેઠક પણ કરી હતી, જેમાં દ્વિપક્ષીય ભાગીદારી મજબૂત કરવાની સાથે સ્વતંત્ર, મુક્ત અને સમાવેશી હિન્દ-પ્રશાંત ક્ષેત્રનું નિર્માણ કરવા માટે સાથે મળીને કામ કરવાની કટિબદ્ધતા વ્યક્ત કરી હતી.